You are here

دعوة لاعتصام في ميدان التحرير ضد التعديلات الدستورية

Primary tabs

Location: 
الحديقة المستديرة بميدان التحرير - القاهرة
Organizers: 
شباب بيحلم ببكرة

الحق يا مصري آخر مظاهرة قبل الغاء الجمهورية واعلان مصر عزبة مستقلة

مش عايزين تعديل دستور .. عايزينك ترحل وتغور

يوم الأحد 25\3 الساعة 6 مساء هنعتصم في ميدان التحرير و نبات الليلة دي عشان نقول لأكبر عدد ممكن من أخواتنا على خطر تعديلات الدستور.

يوم الاثنين فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا .

تعديل المادة 179 بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا قانون , وكله بالدستور يا بيه !

أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني انكتب علينا وعلى ولادنا رئيس من الحزب إياه لحد ما نموت , ورئيس الجمهورية بقى من حقه يحل مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه .

يعني من الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .

احنا بقالنا كتير بنتكلم عن الحرية والديمقراطية وحقوق الإنسان والشفافية وتداول السلطة والنهب والفساد والقطارات والعبارات والسرطان والعنوسة والبطالة والفقر والجهل والمرض و عندنا استعداد نفضل نتكلم ونحاول تاني وتالت , بس التعديلات دي هتحرمنا حتى من أبسط حقوقنا كبني آدميين وهو حق الكلام والتعبير, الموضوع مش المعارضة والناس بتوع السياسة بس , الموضوع هيضرنا كلنا , أي حد هيفتح بقه دلوقتي ممكن يبقى إرهابي مفيش حرمة ليه ولا لبيته وعرضه وحريته وكرامته , من حقنا نكون زي كل شعوب الدنيا اللي واخدة حقها والحكام بيشتغلوا موظفين عندها , من حق ولادنا يعيشوا في مصر أحسن من اللي احنا عشنا فيها , كل واحد فينا هيجيله يوم يسأل نفسه أو ولاده هيسألوه كان فين يوم ما البلد اتباعت وبقت تكية لمبارك والعصابة اللي معاه ؟!

دي آخر فرصة نتكلم واحنا لسة بني آدمين نرفض الاستعباد والذل اللي عايزينا نعيش فيه , يمكن تكون دي آخر مرة نقدر ننزل الشارع فيها نعبر عن رأينا ما هو بعد كدة اللي هيتكلم هيبقى إرهابي .

يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها .

شباب بيحلم ببكرة

  • نتقابل يوم الأحد الساعة ستة في الحديقة المستديرة

*

  • للنشر في المدونات والمجموعات البريدية يا رجالة*

Comments

ليه يا علاء كل حاجة في القاهرة و مش فيه حاجة بتحصل في الزقازيق؟ يعني انا عايز اعتصم معاكم بس ازاي الواحد يسافر و يرجع و مواصلات و اهل و رايح فين و غلب. مش تعرفوا تيجوا مرة عندنا الزقازيق؟و الله عندنا برضه ميدان على الضيق اسمه ميدان التحرير برضه و ينفع

طيب ما تحاول توصل لأعضاء كفاية بتوع الزقازيق و تسألهم ليه يا جماعة مش بتنظموا حاجة و تعرض أنك تساعدهم؟

that is a good idea. it will be away from the security forces.

-AA

أعضاء كفاية اللي في الزقازيق ناويين ييجوا ميدان التحرير يوم الاحد هما كمان , إذا ما مقدرتش تيجي ممكن تبقى تقابلهم بعد كدة , ده رقم أحمد صالح منسق كفاية في الشرقية 0121663885

هل سبق أن رأى أو قرأ أحدكم نصوص التعديلات الدستورية في أي مكان؟ إذا حصل فأين؟ هل لديك رابط لها على الخط؟

نص التعديلات ده غير أن مقترحات التعديلات نشرت في الجرائد لو أنا فاكر صح

ليه موش في قلعة الكبش ومساكن زينهم المسافة بينهم و بين التحرير- طريق الكورنيش 10 دقايق بالعربية والصحافة موش ها تغلب عشان توصل

للأسف الوقت أضيق من أننا نغير المكان، لكن فعلا مطلوب نبعد بقى عن وسط البلد شوية، يالا لو عرفنا نتشجع و ننزل بعد تعديل الدستور نبقى نروح مساكن زينهم

لو سمحتم انا عايز اي حد يكلمني على ال msn او يديني رقم اي حد من منظمين حركة كفايه مش عايز انزل لواحدي و اتمسك في التحرير و الاعتصام يطلع في شبرا في الاخر ارجو الاهتمام علاء منال لي حد لو سمحتوا الاهتمااااام اشطاط ؟

Help Set Egypt Free http://masr-heya-ommi.blogspot.com/

علاء معلش اصلى فى اسكندريه ولازم اظبط امورى علشان اعرف اجى عايز منك تفاصيل اكتر يعنى المده اد ايه والظروف وهتقعدواهناك قد ايه واللذى منه فيا ريت تظبطنى فى الحوار ده علشان لازم ارجع يوم الاتنين علشان الحق الاستفتاء فى اسكندريه

الاعتصام هيبدأ الساعة ستة و نظريا هيستمر لثاني يوم

و الناس تقدر تيجي في أي وقت و تمشي في أي وقت

لكن طبعا ممكن رد فعل الأمن يفرض علينا تغييرات

خلاص الوقت قرب ولازم نكون جد لازم نرتب مظبوط للإعتصام اللحظة الاولى هيا اللى هتحدد الإعتصام هيينجح أو لأ؟ فيه إقتراح علشان نعرف بعض ونشجع بعض بجد مش باهزر أيه رأيكم لو كل واحد فيكم جاب صفارة من بتاعة الكورة وقعد يصفر بيها ده معناه أنه مشارك معانا فى الإعتصام ونبتدى نجمع بعض ولو الامن أتحرش باى حد يبقى بيصفر علشان البت بتاعته وكمان الصفافير هتبقى جامده لما نكون ال ألفين يارب نوصل كده ونصفر هتطلع عفاريت ميدان التحرير على الامن ويركبوهم وساعتها مش هيبقوا فاضيين لينا لا الظباط ولا العفاريت أنا باتكلم بجد انا ماعرفش حد فيكم شكلا , أنا شاركت فى كل المظاهرات اللى كفاية عملتها وآخرها بتاعة مجلس الشعب وركبنا ساعتها أتوبيس وهتفنا فى الناس لحد ماروحنا نقابة الصحفيين مش هاقدر اعرفكم غير بالصفارة أنا هاصفر طول الليل فى ميدان التحرير أشوفكم هناك

لا اعرف ان كان احد ما موجود الان اونلاين و لكن عموما سأبذل ان شاء الله كل مل فى وسعى لأون هناك غدا فى التحرير فى الحديقة المستديرة قد لا ابت لانى بنت و بمفردى و لانى اريد ان اتواجد بمحل الاستفتاء فى ميعاده فى اليوم التالى و لكن فقط لأتاكد هل الحديقة المستديرة هى التى اما المجمع و سؤال اخر و انا جادة لأنى لست متأكدة و اريد التاكد هل يعلم احد المكان المخصص للاستفتاء فى منطقة حدائق القبة لأنى لست متاكدة من الموضع و لكنى سأقتل نفسى لاصل ان شاء الله فقط ارجو الاجابة سريعا

احنا فى المنصورة عاملين وقفة احتجاجية ضد التعديلات الدستورية و عودة زائر الفجر و ندعوا الاخوة اعضاء حركة كفاية و القوى الوطنية فى الزقازيق و دمياط و الغربية بالمشاركة فى الوقفة دى بالمنصورة أمام جامع النصر و احنا عملنها الساعة 2 الظهر علشان نخلص النحتة دى و نطلع على مصر نشوف المقطوعية بتاعت اعتصام التحرير و هو كلة بثوابة

رحت زى ماقلتوا مالقتش حاجة ولاقيت الأمن محاصر الحديقة لو فى تجمع فى مكان تانى ياريت تقولولى ؟

وقائع التزوير بالصور هنا

أرجوا نشرها لأن مدونتي غير معروفة http://3atris.blogspot.com/

وشكرا يا علاء ويا منال على المجهود الرائع ده