النجوم بتفضل دروبال

Thu, 2006/02/09 - 10:21 — alaa

اليومين اللي فاتوا نقلنا مجموعة من فطاحل (حلوة فطاحل دي) التدوين المصري من blogger/blogspot لدروبال و استضفناهم على سيرفر manalaa.net.

أفريكانو نقل لhttp://africano.manalaa.net
جار القمر نقل لhttp://jarelkamar.manalaa.net
ابليس نقل لhttp://shadow.manalaa.net

و النهاردة نقلنا مدونة مالك بس دي عند عزبي مش عندنا العنوان الجديد للمدونة http://malek-x.net

أغلب المدونات المصرية لسه بتستخدم خدمة blogger و للأسف برنامج blogger ضعيف جدا و ينقصه امكانيات أساسية لأي مدونة (أبسطها امكانية تصنيف التدوينات)، للأسف كمان المدونين الجدد أغلبهم بيسجل على blogger برضه.

لو بتفكر تبدأ مدونة جديدة أحسنلك تروح لخدمة مبنية على نظام ادارة محتوى حر/مفتوح المصدر و امكنياته متقدمة. برنامج Wordpress برنامج بسيط جدا و استخدامه يمكن أسهل من blogger و مع ذلك امكانياته أقوى بكتير، و في مكانين بيقدموا خدمة استافة مدونات wordpress مجانا

أو ممكن تنقل عندنا على manalaa.net زي الفطاحل اللي فوق دول و تستخدم Drupal، و ده من أحسن نظم ادارة المحتوى، دروبال مناسب جدا للمدونات لكن امكانياته غير محدودة و بيستخدم لعمل أي نوع من المواقع. لو عايز حاجة أزيد شوية من مجرد مدونة، أو عايز تفتح لنفسك مجال واسع من الامكانيات اللي ممكن تحتاجها في المستقبل يبقى مفيش أحسن من دروبال.

أحنا بنستضيف المدونات المصرية و المواقع المصرية الغير هادفة للربح مجانا و بنحاول نبني خدمة كويسة و بنحاول نبسطها و نسهلها خالص (و اذا كان بيسو بتاع ريد مور عرف يستخدمها يبقى لا يمكن تستعصى عليك)، دروبال مش ببساطة و سهولة wordpress بس يستاهل المجهود الزيادة (المجهود الزيادة في الأول بس، العمليات اليومية العادية اللي زي نشر محتوى جديد بنفس درجة البساطة في دروبال).

مدونات دروبال على manalaa.net

مدونات مصرية بتستخدم drupal

مواقع مصرية بتستخدم drupal

روابط لمواقع drupal

drupal & manalaa.net

Add new comment
2548 reads

Fri, 2006/02/17 - 20:14 — Ahmed Hashim

I am on of the Stars :p

Well, First, Thank you Alaa for your support. I got a blog from Alaa hashim.manalaa.net i know that i am not using it a lot but this is because time limitation. Alaa support me too while i am developing my EGJUG. I have been using drupal for about 1 year now. I think it is wonder thing to do with.

Second I'll recommend all people to use Drupal because it is very powerful. Drupal is do more than you can imagine if you are looking for a personal blog. If you want to have a community like Eglug or Egjug it is the right choice BUT, "But is important here" you should know how to customize it and administrate it. Eglug doesn't have any problem with drupal because Alaa & MSameer is doing a good job with Drupal and PHP but in Egjug we have many problems. Ikhnaton offers us the help to do many things in Drupal with php. I hope that there will be some kind of technical support for Drupal in Egypt. Drupal website ,forums & IRC can give 10% support in my opinion.
I think Drupal support will be for money soon.
If any one want to help in Drupal it will be fine.

thank you and have a nice Drupal

Regards,

Sun, 2006/02/12 - 15:23 — sph1nx (not verified)

some questions

بقولك ياعلاء بالنسبة للثيميز على الدروبال علشان اغيرها باحتاج اف تي بي اكسيسلا زي نظام ال invision power board بعمل لوود لملف اكس ام ال و بالنسبالك بتدي اليوزرس اكسيس ولا لأ

حاجة تانية ليه ماتحاولش تقسيم المدونات في المجمع زي نظام ايجي بلوججر على اساس نوعها يعني سياسية شخصية

اخر حاجة انت برضه ماردتش عليه هل ممكن اربط ال بي اتش بي نوك بالمجمع عن طريق

rss

thanks

Sun, 2006/02/12 - 15:54 — alaa

التيمة زي ما

التيمة زي ما قلت هتغيرها عن طريق تعديل ملف css و ده من جوه النظام نفسه و من غير ftp access

موضوع تقسيم المدونات ده زي قلته لأن المدونين عاملين زي معلقى الكورة بيتكلموا في كل حاجة، الاصدار الجاي من المجمع هيبقى فيه امكانية أن القراء يشاركوا في تصنيف التدوينات بأسلوب التصنيف الشعبي بس أنت ادعيلي يكون لينا عمر

معنديش فكرة php nuke فيه rss ولا لأ بس غالبا فيه، اسمع كلامي و بلاشه.

و أسف أني متأخر على الناس اللي عايزه تنقل، أنا بجرب نظام جديد للنقل أحسن شوية استحملوني يومين كده ولا حاجة.

Sun, 2006/02/12 - 14:22 — ahmad (not verified)

مدون و مش بتاع كونبويوتر

أنا يا عم علاء يا دوب باعرف أكتب اسمي،ماليش أي سابق معرفة بالدروبال ولا دياولو، فررت أنزل وورد برس، لقيتة زب فايل مليان حاجات غريبة، هو الواحد يعمل إيه عشان يفتتح بلوج محترم، من غير ما يضيع عمره في فهم العقبات التكتنولوجية دي؟

و إزاي أحول لونكس؟

و انا مع ان الواحد ما يعملش هوست عندكم.. مش عشان سحن الواحات- لإنه إتهد من زمااان - لكن عشان المباحث، و ما حدش ضامن عمره، بعض الشر عليكم .

Sun, 2006/02/12 - 18:34 — sph1nx (not verified)

ياعم احمد

ياعم احمد معتقل الواحات اللي بقول عليه مبني تحت ارض السجن اللي اتهد ;)

بالنسبة للورد بريس اي سكربت بييجي معاها ملف ريد مي بيبقى فيه تعمل ايه بالظبط

بالنسبة لموضوع الهوست بالأضافة للمواقع بتاعة علاء ممكن تجرب الموقع ده http://weblogs.us/

بيديك 2 جيجا سبيس للورد بريس هوستنج يعني دلع نفسك وعلى مااذكر موقع تدوين كان فيه شرح للورد بريس

peace

Sun, 2006/02/12 - 16:01 — alaa

يعني و هما باقي

يعني و هما باقي المدونين كان ليهم سابق معرفة بدروبال؟ اسألهم كده الموضوع صعب و لا لأ و لو صعب قد ايه.

وورد بريس و دروبال مش بيشتغلوا على جهاز عادي دول بيشتغلوا على سيرفر، يعني عشان تشغل وورد بريس لازم تحول جهازك سيرفر و دي شغلانة طويلة، اللي عايز يفتح بلوج محترم من غير ما يتعلم الكلام ده كله يشوف حد بيقدم خدمة استضافة مدونات زي عندنا و زي المكانين اللي بيقدموا wordpress اللي أنا كتبت عليهم فوق.

جنو/لينوكس اسأل عليه عند http://www.eglug.org مش هنا

متخافش من موضوع المباحث، أنا عامل حسابي و فيه ناس موثوق فيها معاها access عشان لو حصل حاجة بعد الشر يعني، و عموما أحنا ناس غلابة و مبنعملش حاجة تستدعي المباحث، الواحد عرضة لأن تطسه عربية أكتر مما هو عرضة لخطر المباحث.

Sat, 2006/02/11 - 12:57 — Ximo (not verified)

converting blogspot content......

Before moving to drupal based host or wordpress, is a reliable script or program that can backup my blogspot content and smoothly convert it to target platform? What about the pictures hosted on blog spot? Would it automatically save them and then re assign the links on its own if such tool exists? Blogspot is very slow in many ways and kinda boring.

Sat, 2006/02/11 - 16:54 — alaa

the only way to backup

the only way to backup blogspot is to republish your blog on a seperate ftp sever. if you thought blogspot was slow let's see how you'll react when you try to republish on ftp, slowest thing you could ever do.

but I assume the blogspot admins are taking their own backups and things are safe, the migration scripts do not touch the content, they only change configs and the template and these can easily be backed up.

wordpress version 2.0 has an automated tool to migrate content, I'm working on automating my steps for drupal but at the moment I do them manually.

pictures are a problem, the scripts don't touch them and blogspot servers don't deliver pictures if the referrer is not a blogspot server (which means the moment you migrate the images will not show up), those who hosted their pics on other services like flickr will not need to do anything.

Fri, 2006/02/10 - 14:25 — Anonymous (not verified)

دي مؤامرة

دي مؤامرة شريرة من علاء لفرض أفكاره الهدامة وأيديولوجيته اليسارية بتاعة المحتوى المفتوح على عالم التدوين.

احترسوا يا مدونين.

ايه اللي مدايقكم في بلوجسبوت؟

عشان كام خاصية عبيطة؟

هتنقلوا ليه؟

Fri, 2006/02/10 - 15:17 — alaa

لا مؤامؤة

لا مؤامرة المحتوى المفتوح لسه ما شوية عليها، دي مؤامرة البرمجيات الحرة.

أكبر مشكلة في بلوجسبوت هي عدم امكانية تصنيف التدوينات، لاحظ أن عدد المدونات بيكبر و الجمع بقى بيتحرك بسرعة جدا، لو كل حد بيصنف نقدر نتفرج على التدوينات بتصنيفها و نسهل على الناس الدنيا شوية.

لكن اللي محتاج التصنيف و بس مش محتاج دروبال و أسهله يستخدم ووردبريس، الفكرة في دروبال أنك تفتح لنفسك الطريق لامكانيات أكتر يمكن تحتاج جزء منها في المستقبل.

بص كده على لسته الفرص المتاحة مع دروبال

Fri, 2006/02/10 - 01:20 — رامي

احترسوا واحذروا

أيّها المدوِّنون.. احذروا المؤامرة التنينيّة لاحتكار المدوّنات المصريّة.. طريقة معروفة لبسط النفوذ،، لكننا لن نخضع لهذه المخططات..

أنا على فكرة برضه حجزت مكاني في المؤامرة بس مش فاضي أعزل

R at manalaa

Thu, 2006/02/09 - 22:34 — sph1nx (not verified)

mashy

طيب ماشي ايه الخطوات اللي اعملها علشان انقل البلوج عندكوا؟

المشكلة ان في كابوس بيطاردني دايما انك امن الدولة هيستضيفوك عندهم في معتقل الواحات و مفيش حد هيدفع الهوست لغاية مالشركة تمسح الأكونت بتاعك و يضيع كل اللي ان كتبته

سؤال تاني مالوش علاقة بأي حاجة هل في برنامج احطوا عندي يحولي الكمبيوتر لسيرفر بي اتش بي و اباتشي بدل العملية البضان بتاعة تركيب ال بي اتش بي لوخدها و ال mysql لوحدها و ال اباتشي لوحدها علشان انا بفرمت الهارد بشكل مستمر

Fri, 2006/02/10 - 14:17 — msameer@foolab.org

يا راجل تف من

يا راجل تف من بقك!

على العموم لو ده حصل ابعتلى و انا اجيبلك الداتا بيز

انا خط الدفاع الاول و التانى و التالت كمان!

بالنسبه لتحويل جهازك الى سيرفر فعليك ب wamp "دور عليه فى جوجل"

بس ده معاه php5 و تقريبا مش كل حاجه هاتشتغل معاها مضبوط

Fri, 2006/02/10 - 03:04 — alaa

ابعتلي ايميل

ابعتلي ايميل على alaa@manalaa.net عشان نرتب النقل

لو خايف من مضوع أمن الدولة هات لنفسك hosting كده تضمن مفيش أي تأثير خارجي عليك. عموما أنا بتيح لك تعمل backup

في بتاع بينزل apache و php و mysql بس مش فاكره، أسأل على eglug.org أو أحسن نزل جنو/لينوكس على جهازك، بيجي معاه الكلام ده كله و زيادة>

Thu, 2006/02/09 - 14:57 — خيال الظل (not verified)

سمير

يا استاذ سمير حضرتك قمر مش نجم :-)

Thu, 2006/02/09 - 16:32 — msameer@foolab.org

يا عسل عايزين

يا عسل

عايزين نقعد مع بعض و نطلع بالخطط الخبيثه اللى بنطلع بيها ;-)

Thu, 2006/02/09 - 14:53 — elnadim1

طيب إقتنعنا يا

طيب إقتنعنا يا ريس بس ننقل إزاى

Thu, 2006/02/09 - 17:30 — alaa

للأسف طريقة

للأسف طريقة النقل اللي صممتها معقدة شوية، عوما أنا اللي بقوم بيها لو أنت مستعد تدخلني على حسابك في blogspot لمدة خمس دقائق. ابعتلي ايميل على alaa@manalaa.net و أحنا نرتب الموضوع ده.

Thu, 2006/02/09 - 14:35 — sph1nx (not verified)

ana tany

معلش سؤال كمان ياعم علاء ايه نظام ال skins في دروبال علشان انا بصيت على بلوج ابليس لقيتو بضان هل دروبال بيديني امكانيات متقدمة في تصميم السكنز ولا بس بغير الصورة اللي في الهيدر زي وورد بريس سلام

Thu, 2006/02/09 - 17:35 — alaa

مش صحيح أن

مش صحيح أن wordpress بيسمحلك تعدل الصورة فقط.

عموما دروبال بيديك امكانيات متقدمة جدا في تصميم السكنز بس لازم تكون بتعرف CSS.

على manalaa.net ممكن تحرر و تغير في التيمة من جوه الموقع نفسه، أو لوأنت شاطر ممكن تعمل سيرفر تجريبي على جهازك و تعمل تصكيك و تبعتهوللي عشان أحمله

Thu, 2006/02/09 - 16:31 — msameer@foolab.org

لو بتفهم CSS ها

لو بتفهم CSS ها تتظبط!

و لو عايز تعمل ال ثيم بتاعك من الاول ممكن بس لازم تكون فاهم php & CSS

Thu, 2006/02/09 - 14:27 — msameer@foolab.org

يا عزبى يا بتاع مايكروسوفت

wget -c -S http://ezabi.gtegypt.org

--14:23:49-- http://ezabi.gtegypt.org/ => `index.html'

Resolving ezabi.gtegypt.org... 196.218.194.67

Connecting to ezabi.gtegypt.org|196.218.194.67|:80... connected.

HTTP request sent, awaiting response...

HTTP/1.1 416 Requested Range Not Satisfiable

Content-Length: 0

Content-Range: bytes */1433

Server: Microsoft-IIS/6.0

MicrosoftOfficeWebServer: 5.0_Pub

X-Powered-By: ASP.NET

Date: Thu, 09 Feb 2006 12:24:58 GMT

Connection: keep-alive

.NET مش .org ;-)

Thu, 2006/02/09 - 17:36 — alaa

أسفين با فندم

Thu, 2006/02/09 - 14:24 — msameer@foolab.org

ولا تفرق

ولا تفرق معايا

انا باستخدم دروبال و ده المهم

لو جبت 100 نجم ولا تفرق برضو المهم ان انا اللى باستخدمه :-P

Thu, 2006/02/09 - 14:12 — sph1nx (not verified)

ha agy?

ها ياعم علاء ينفع اجي عندك ولا انا كخة ;)و كنت عايز اسألك سؤال ليه ماتديش الناس ال سبيس اللي هما عايزنها و هما يركبوه السكربت اللي هما عايزينو معلش سؤال تاني انا بخطط استخدم بي اتش بي نوك هل هناك امكانية لربطها بنظام ال rss اللي موجود في المجمع ولا لآ

Thu, 2006/02/09 - 17:38 — alaa

أنت كخة بس تنور

أنت كخة بس تنور عندنا، الخدمة مفتوحة للكل

بلاش طمع اللي عايز يركب أي سكريبت يشخشخ جيبه.

و اياك تستخدم php nuke ده بلوى مسيحة.

Thu, 2006/02/09 - 16:29 — msameer@foolab.org

php nuke ?

php nuke ? اوعا

موت و ماتستخدموش

وحش جدا جدا جدا جدا

اما بالنسبه لاعطاء مساحه و كل واحد يركب عليها اللى هو عايزه فانا مش هارد على علاء بس هاقولك ان ممكن ب 20 جنيه تاخد مساحه فى شركة استضافه كويسه المشكله انك لازم تدغعلهم السنه على بعض

و ممكن 2 يشتركوا مع بعض و كل واحد يدفع 10 جنيه

او 4 و كل واحد يدفع 5 :-)

Thu, 2006/02/09 - 13:41 — Anonymous (not verified)

علشان موضوع

علشان موضوع ريد مور ده مفهمتوش إلى مافهمش يدوس هنا

http://www.manalaa.net/subliminal_message

Thu, 2006/02/09 - 12:59 — خيال الظل (not verified)

http://shadow.manalaa.net

انقل لدروبال و عيش في مملكة الوراجى
و عيش مع النــــجـــــــــــوم

دروبال ... انت النجم كل يوم

دروبال ... عالم بلا حدود
و اهم حاجة
read more
read more
read more

Thu, 2006/02/09 - 12:25 — egiziana (not verified)

Random image

tags used in blog posts

User login

Live discussions

Recent comments

Syndicate