Manal and Alaa's bit bucket free speech from the bletches

الأرقام الرسمية للحكومة وفقا لما نشر في تقرير التمنية البشرية بتاعت برنامج الأمم المتحدة للتنمية لسنة 2006 بيقول 6 مليون مستخدم انترنت في مصر، حسب فهمي الرقم ده مفيهوش محاولة لتقدير مستخدمي الوصلة و النت كافيه.

حسب تصريحات مرفق الاتصالات عدد خطوط الدي اس ال لا يتعدى ال400 ألف و في قول 300 ألف.

اذن الغالبية العظمى الساحقة من مستخدمي الدايل أب، و هنفترض أن نسبة كبيرة جدا منهم بتدفع أقل من 95 جنيه شهريا و الا كانوا حولوا دي اس ال.

أنا عملت تجت حسبة لتقدير قيمة الاثنين جيجا بالاتصال التليفوني و طلعت في ظروف مثالية و همية 110 جنيه و في الواقع لن تقل عن 200 جنيه.

مسألة الدعم مهمة، لكن خلينا نقول أن الاحصائيات الدولية بتقول أن بروتوكول البيت تورنت وحده مسئول عن 15% الى 35% من كل حركة البيانات على الانترنت، غني عن الذكر أن الأغلبية العظمى الساحقة للحركة دي عبارة عن تبادل ملفات ترفيهية (مع عدم التقليل من أهمية الترفيه و تعاطى الثقافة).

ده بروتوكول واحد فقط، لو هنتكلم عن الدعم أظن ضرورى نسأل نفسنا ايه حجم الدعم اللي أحنا مستعدين نتحمله في صورة ضرائب و ديون و معونة لحاجة نصف استخدامها ترفيهي (نصف من ناحية حجم البيانات فقط طبعا). توجيه الدعم لاشتراك محدود اذن موضوع يبدوا منطقيا (يمكن طبعا أننا نتوصل لنتيجة تعظم من قيمة الترفيه و التبادل الثقافي أو تنحاز لما هو ممكن و ليس ما هو متحقق و نطالب بدعم أوسع، بس برضه توجه الوزارة منطقي تماما).

احصائيا الناس اللي حياتها هتتوقف لو ارتفع سعر الانترنت غير المحدود قلة، و لو ده ثمن ضروري لانتشار النت بشكل أوسع فمجتمعيا ده ثمن مقبول (ده غير أنه مش مؤكد أصلا أن هيحصل أي ارتفاع في الأسعار).

كلام مالك ملوش وزن لسببين، أولا مالك معندوش معلومات كافية تسمحله يعمل مقارنة حقيقية ما بين الأسعار في بلدنا و في البلاد اللي اختارها و وسيلته في المقارنة عبثية لأنها مبتاخدش معدلات تحرك السعر في الاعتبار.

ثانيا أصلا السعر مكانش خاضع لاقتصاديات السوق و المنافسة لأن المرفق كان متحكم في الأسعار و الخدمات المعروضة (و سبق للمرفق معاقبة شركات قامت بتخفيضات شديدة)، ابتداء من سبتمبر الشركات هتتحكم في السعر فعلا و بعد فترة هنقدر نرصد نتائج ده و نتناقش في هل فيه احتياج للضغط على الشركات أنها تخفض السعر ولا لأ (و هنحتاج معلومات تفصيلية عن ربحية هذه الشركات وقتها).

يا ريت تكلمني عن ايجابية حملة الذعر اللي اتعملت على موضوع سفاح مدينة نصر، وقتها ابقى أشوف ايجابي حملة هلاوس الدي اس ال.

أنا رأيي ان 45 في الشهر بطاقة محدودة فكرة كويسة- فكر في الأسر الي مش عاوزه تنزل افلام- بتستعمل النت في التصفح و الايميل وربما بعض المسنجر والسكايب ده ينطبق بالضرورة على أبويا وأمي مثلا

وخلي بالك الدي اس ال يعني قدرة افضل لاتصال اكتر من جهاز حاسب- والوايرلس مثلا- ..

هل 2 جيجا كافي؟ قبل سنوات كان شغلي مشتركين مع شركة بتقدم انترنت عبر الستلايت- وانا باتكلم عن شركة كبيرة ومرة النت قطعت واكتشفت ان الكوتا 2 جيجا في الشهر- لشركة كاملة فيها 500 موظف

انا معترف ان النت اتطورت بس 2 جيجا مش هبل تام

أخيرا- السؤال- هل نريد الدعم الحكومي يتوجه لل 256 غير محدود ام للشريحة الجديدة وسلام

مش عارف اذا كنت موافق أن الدولة المفروض تتحكم في الموضوع ده، رغم أني مش من مشجعي آليات السوق عموما لكن اللي حاصل في بلاد كثير أن في مجال الاتصالات بالذات آليات السوق شغالة كويس و المحصلة النهائية في مصلحة الناس، احساسي لكن معنديش يقين أن عدم تدخل الدولة في التسعير حيكون نتاجه ايجابية لأن المنافسة في السوق ده كبيرة. و امكانيات التوسع كبيرة جدا و دول حاجتين بيفرضوا انخفاض الأسعار.

لكن ممكن جدا أن الحاجتين دول يشوهوا بسبب الاجرائات (ما مدى صعوبة التغيير من شركة لشركة؟) و فقر البنية التحتية (الخطوط الأرضي قليلة و انتشارها الجغرافي محدود و مش كلهم قادرين على دعم الدي اس ال) و سوء الأداء (300 ألف خط دي اس ال ده رقم قليل بالنسبة لعدد الشركات و الوقت اللي قضوه في السوق).

لكن خلينا نتكلم بواقعية، ده سوق و قطاع مبني من الأول على أسس رأسمالية هي دي خطة الحكومة، لو أنا مش عاجبني ده فدي خناقة كبيرة على مستوى الدولة كلها مينفعش أتخانق عليها في سياق تسعير الدي اس ال فقط.

ثاني حاجة أنا بشكك في قدرتنا على تقدير ما هو غالي و رخيص، تعالى نتكلم عن الموبايل مثلا، المحمول غالي جدا و مع ذلك انتشاره في تزايد سريع جدا عدا الخطوط الأرضي السنة اللي فاتت و متوقع يتضاعف في الخمس سنين اللي جاية و يوصل لتغطية 20 مليون خط، من الناحية الجغرافية التغطية شبه كاملة و جودة الخدمة أفضل من الأرضي بمراحل. أحنا بنتكلم عن حاجة أغلى من الأرضي و غالية عموما و مع ذلك ملايين من الكادحين اشتروها لأنهم اعتبروها تستاهل الفلوس و مع تزايد انتشارها تكلفتها بتقل اذن مفيش ضرورة للخناق على السعر دلوقتي بما أنه يبدو مناسب (الاشتراكات بتزيد معدل متسارع) و بما أنها بتخدم شرائح مختلفة و بما أن آليات السوق لا تزال كفيلة بتخفيض السعر.

يمكن يجي يوم و يتوقف نمو السوق و وقتها نحتاج تدخل في صورة دعم أو رقابة على الشركات و فرض هوامش ربح أصغر (أو حتى في صورة تشجيع تقنية بديلة أرخص).

يبقى اذن كون أن السعر عالي مش مربط الفرس. السؤال اللي لازم نسألة عن النت في مصر مش السعر لكن السؤال هو هل التغطية و الانتشار ماشيين في سكة متزايدة و مفتوحة لشرائح عديدة؟ و هل أحنا محققين جزء كبير من ما يمكن تحقيقه من فوائد علمية و ثقافية و اقتصادية و مجتمعية من النت؟

لو الاجابة لأ يبقى ضروري نبص على السعر و البنية التحتية و السياسات و الاجرائات المنظمة و أداء الشركات و نشوف مين في دول السبب لو الاجابة نعم يبقى ضروري نبص على الجانب الغير نظامي من السوق (الوصلة و النت كافيه و سنترالات الVoIP) و نشوف اسهامهم في نجاح الموضوع قد ايه بدل ما نحاربهم.

لا مؤاخذة ممكن حضرتك تطلعلي أنا فين قلت مصر جنة و نعيم؟

و فين اتكلمت عن مرتب سيادتك و لا مرتب أي حد؟

أنت بتقول أني بتفزلك و مش فاهم حاجة، هفترض أن ده معناه أني قلت كلام خاطئ ممكن تعمل قص و لصق للكلام الغلط اللي أنا قلته و توضح الخطأ فيه و تقولنا على تصحيحه لو متاح؟

و بالمرة ما دام أحنا فيها تشرحلنا ازاي الاعتراض على حاجة وهمية مفيد و بالمرة ترد على المثال اللي أنا ذكرته للتحذير من خطورة الاعتراض على حاجة وهمية (بتاع بنوك القرنية و الناس الغلابة اللي بتفقد بصرها بسبب الاعتراض على حاجة وهمية الذي هو أكيد مفيد وفقا لكلامك.

و ايه يا بتاع الدراسات دي؟ هي الدراسات دي تبقى عيبة؟ المفروض مثلا ناخد قرارات و تحركات بالبركة؟ (أصلا هو أنا جيبت سيرة دراسات؟)

و برضه موضوع المتخصصين اللي مزعلك، سيادتك فهمت أصلا أنا بقول ايه؟ ده قطاع القائمين عليه متخصصين تكنوقراط مش ظباط شرطة و جيش كما هو المعتاد و رجال أعمال نصابين كما هو هيبقى المعتاد. هفترض أن لسبب ما غامض ده موضوع مزعلك ده ميفرقش في حاجة أنا مقلتش المفروض يكون كذا أنا مجرد برصد واقع بغض النظر عن رأيك فيه.

نيجي بقى لموضوع مش عايش عيشتنا و لا عمرك عشتها، طبعا بما أن المتحدث مجهول مقدرش أنكر أو أؤكد أنا عشت عيشته و لا لأ، لكن أشكك في قدرتك ان لم تكن شخص مقرب لي أنك تعرف أنا عايش ازاي و عيشت ازاي. لكن خلينا نتخطى الجزء ده، أنا من شريحة مرفهة مقارنة بأغلب مواطني المخروبة و أغلب سكان الكوكب و نحمده على كل شيئ موضوع مش مزعلنا و لا بيكسفنا. لكن يا ترى ده دخله ايه بكلامي؟ هل أنا ادعيت أي ادعاء عن الفقراء و الكادحين؟ هل فتيت في أي حاجة تستدعي بالضرورة أن يكون المتحدث غير برجوازي؟

بلاش دي، ايه في كلامي كان بيعبر عن انحياز شديد للبرجوازية؟ الكلام عن بنوك القرنية؟ و لا عن عدم رفع أسعار السولار لمصلحة البنزين التسعين؟ ولا الكلام عن مقارنة اشتراكات المحمول المدفوعة مسبقا (الكارت) باشتراكات النت المحدودة؟

اه والله ليك حق ده فى مصر التليفون والنت والبنزين تقريبا ببلاش مقارنه بالأمارات ولا انتجلترا

ومشاء الله طلعت الكويت عندهم ميزه وهميه انك تتصل بحد بالكويت من الخارج المستقبل بيدفع معاك تعاون منه على انك مش بتتكلف لوحد شايف التعاون وتقريبا حسب ما سمعت فى دول المتصل والمستقبل الأتنين بيدفعوا على مكالمات الموبيل يعنى الأهو قبلوا بعض أسهل انا طبعا العربى بتاعى وهمى اخر حاجه بس هى دى امكانياتى

من الأخر والله الفى مصر مدلعين بس برده طالع دييك ابوهم لا مرتبات ولا عيشه نافعه

الاول يا استاذ قارن بين مستوى المعيشه هنا واى بلد تانى وبعدين ابقى اتكلم عن الاسعار يعنى حضرتك موظف الحكومه اللى بقاله 16 سنه بيشتغل بياخد حوالى

60 يورو فى الشهر يعنى 720 يورو فى السنه اتكلم بقى براحنتك عن الاسعار والضرايب والدلع اللى مافيش زيه فى الدنيا

حتة الضرائب دي بس اللي صعب الكلام فيها دلوقتي بسبب معدلات النهب المرعبة و سرية بنود عديدة في الميزانية.

أدفع ضرائب ليه اذا كان نصفهم معرفش هيروح فين (رسمي و بالقانون) و النصف الثاني في نسبة رهيبة منه هيروح بعزقة؟

المشكلة بقى اللي بتقلقني ساعات هي أننا لما ننجح يعني في طرد سعادة الباشا مبارك و نعمل الديمقراطية، الناس هتكون اتعودت و معرفش هتتقبل نظام ضرائب مرتفعة يسمح لنا باعادة بناء البنية التحتية و توفير دعم للمحتاجين ولا لأ.

أو يقعدوا في البيت و يشتغلوا و يقضوا مصالحهم عن طريق شبكات رخيصة التكلفة.