كفاية سلبية، هنقول لأ

Wed, 2007/03/21 - 10:39 — alaa

Start: 2007/03/26 - 00:00

End: 2007/03/26 - 18:00

Location:

في دائرتك الانتخابية

Organizers:

المصريين

دعوة حركة كفاية لمقاطعة الاستفتاء على التعديلات الدستورية خطأ شديد و استسهال غير مفهوم، فرغم أن مفيش أمل في استفتاء نزيه لكن مشاركتنا بادلاء الأصوات و الرقابة الشعبية خطوة ايجابية ضرورية و أظن خبرات المعارضة مع انتخابات مجلس الشعب و النقابات المهنية و اتحادات الطلاب و النقابات العمالية و الغرف التجارية و حتى مشاركة حزب الغد في معركة الانتخابات الرئاسية كانت كلها محطات مهمة في الصراع من أجل الديمقراطية كسبت المعارضة المصرية فيها الناس اللي شافت بنفسها ازاي النظام الحاكم بيتلاعب بصوتها.

أن تدعوا شعب لا يشارك أصلا أن يفضل في بيته ده هبل و تأصيل للسلبية، للأسف مفيش وقت نتناقش نقنع بعض، الاستفتاء على تعديل الدستور يوم الأثنين القادم.

دي دعوة شخصية مني لعدم المقاطعة، روحوا دوائركم الانتخابية و ارفضوا التعديلات الدستورية.

مواليد ما بعد 1982 المفروض أن كلهم مسجلين بالجداول الانتخابية تلقائيا و يحق لهم الانتخاب بالبطاقة الشخصية في دائرتهم.

اللي يروح مينساش يقعد مدة أو يفضل اليوم كله في دائرته عشان يرصد بنفسه ايه اللي بيحصل و يرصد بنفسه حجم و كثافة الحضور لازم نبتدي نتعود على موضوع المراقبة الشعبية بما أن مبارك ناوي يحرمنا من رقابة القضاء على الانتخابات.

Comments

Tue, 2007/03/27 - 11:14 — أحمد اللي عايش في الزقازيق (not verified)

مشاهد استفتائية

يوم الأحد الساعة 12.30 ظهرا:

انا:دور تاني لو سمحت
الموظف:يا حبيبي مش موجود اسمك مش موجود في الكشف انا لسه مدور قدامك اهه
انا:يعني ايه مش موجود انا مواليد 88 يعني قيد تلقائي
الموظف:اكيد انت ساقط قيد انت مولود فين؟
انا: في الزقازيق في ابو طرطور كمان
الموظف:الانتخابات الجاية بقى و عليك خير بس مش تنسى تسجل اسمك قبلها!

يوم الاتنين 8.30 صباحا:

انا:هاتنزل الاستفتاء يا بابا زي ما قولتلك؟
بابا:ا..ا..اه يا حبيبي ان شاء الله(بياخدني على قد عقلي)ا
انا:و انت يا ماما؟
ماما:بلاش دوشة ووجع دماغ
انا:و انت يا منال و ياسمين؟
منال:انا مش فاضية و ياسمين مقاطعة

يوم الاتنين 2.30 بعد الظهر:

انا:انتخبت يا بابا؟
بابا:اخ! نسيت
انا : طيب مين عندك في الشغل انتخب؟
بابا: يا بني ماحدش فاضي للكلام ده و بعدين هايزوروها هايزوروها

يوم الاتنين 6 مساء:

انا: الو ازيك يا جدوعلي
جدو: مين بيتكلم
انا:انا احمد ابن بنتك ياجدو
جدو: ايوه يا احمد ازيك
انا: كويس الحمد لله....قوللي يا جدو ايه اخبار الستفتاء عندكم في البلد؟(جدو عمدة بلدنا)ا
جدو: و الله يا احمد التزوير على ودنه عندنا
انا:هتبلغ يا جدو؟
جدو:ابلغ ايه يا بنى الحكومة عايزة كده
انا: وانت شاركت ياجدو؟
جدو: انا تبع الحزب الوطني و قلت نعم

الاتنين 6.30 مساء:

انا: ازيك يا عمي رحت الاستفتاء؟
عمي: استفتاء ايه ؟
انا: بتاع تعديل الدستور
عمي:اآآآه هو كان النهارده؟
انا: الجواب وصل يا عمي!

الاتنين 11 مساء امام التليفزيون المصري

ماما: بكره يعلنوا النتيجة و يقولو الشعب وافق باغلبية على الدستور ربنا على الظلمة اللي بيزوروا ارادة الشعب
انا(بعد قرصين باراسيتامول و واحد ميجرانيل و كوباية شاي تقيل من الصداع):ماما عارفة هايقولو ايه بكره بجد؟
ماما:هيقولو ايه
انا: هيقولو الشعب المصري طيّز و قعد في لبيت و الحزب الوطني ولفق على التعديلات اللي طرحها رئيس الحزب الوطني
يا رب ليه كده!شايفين مصر الحلوة الجميلة اللي بتشارك؟ شايفين اللي عايزين ديمقراطية ديلفري؟حاجة تقرف و تغم النفس

Mon, 2007/03/26 - 21:45 — a m r (not verified)

والله كان معاك حق

فعلا المقاطعة كانت فكرة فاشلة

رحت الصبح اشارك لقيت المدرسة فاضية عن اخرها بخلاف ايام انتخابات مجلس الشعب اللي كانت هيصة من قبل ما اللجان تفتح اساسا ما كانش فيه غير بتوع الوطني لدرجة اني اول ما جيت افتكروني اخوان جاي اراقب

لقيت اسمي على طول مش زي المرة اللى فاتت و الناس كانت متعاونة و هي مستغربة ان فيه حد جه و مهتم كدة بس ما كانش فيه ستارة

بجد لو كان المقاطعة شاركت كانت ممكن النسبة الفعلية تعدي ال 50 % "لا" مع شوية مراقبة قدام كل مدرسة و حد بيعد الناس اللى داخلة هيقدر بسهولة يرصد نسبة الاقبال الفعلية واللى اكيد برضه هتبقى غير اللي هيعلنوها و كانوا طابخينها بشهادة احد الموظفين اللى كان بيسود من امبارح زي ما قيل

المشاركة فعلا لا تذكر بالمقارنة بمشاركة المجلس اللى كانت برضه ضعيفة، لكن على الاقل الناس كانت بتحركهم عصبية قبلية او شعبية احد النواب او مصالح وتظبيطات لكن المرة دي ما فيش دافع لحد انه ينزل، لو كانت المعارضة كلها نزلت كانت هتخلى النتيجة الفعلية غير المطبوخة حاجة تانية خالص بجد

Wed, 2007/03/28 - 02:13 — محمود سعيد (not verified)

الأستاذ متفائل

قال يعنى الناس لو كانت راحت كان زمان التعديلات معدتش

هأ هأ هأو

Mon, 2007/03/26 - 17:24 — shit happens

تسعه وتسعين اشيك من سبعين :S

عديت علي 5 لجان تقريبا فاضيين ومأدلتش بصوتي لاني مش عاوز النتيجه تطلع 70%ولا 72 % انا عاوزها تطلع 99 % علشان الرقم ده هيكون شكله عاطفي اكتر ..

خد عندك الحوار ده , بس بعد تشفير الاسماء

ب زززز , نظرا لان النجوم مش نافعه لانها بتلخبط التكست

(04:41 PM) Player says : اخونا زززز

(04:41 PM) Player says : مسك امانة التعريص في الحزب الوطني

(04:42 PM) Bo0o0ody says : ههههههههههههههههههه

(04:42 PM) Player says : انتا عرفت الحوار ده ؟

(04:43 PM) Bo0o0ody says : ? اللي هو

(04:43 PM) Player says : طبعا انتا عارف موقف ززززز من الحزب

(04:43 PM) Player says : انه حزب معرص وانه عمره ما هيدخل نفسه والحوارا للي بالك فيه ده

(04:44 PM) Bo0o0ody says : اه

(04:44 PM) Player says : صاحبك متصل النهارده بينا

(04:44 PM) Player says : انتوا فين

(04:44 PM) Player says : احنا خلصنا و مروحين

(04:44 PM) Bo0o0ody says : اللي هو زززز ?

(04:44 PM) Player says : قال طيب تعالولي عالحزب

(04:44 PM) Player says : اه

(04:44 PM) Player says : حزب ايه يا ززززز

(04:44 PM) Player says : الحزب الوطني

(04:45 PM) Player says : المهم ليه يا .ززززز

(04:45 PM) Player says : قال هتعرفو

04:45 PM) Player says : قولنالو نفض لنفسك

(04:45 PM) Player says : قال خلاص استنوني وانا جاي

(04:45 PM) Player says : ونلاقي اخونا ززززز

(04:46 PM) Player says : معاه روزمتين ورق كل واحده يطلع 3000 ورقه ولا حاجه

(04:46 PM) Player says : وبيدينا روزمه وبيقول خدوا وزعو دي في الكليه بكره

(04:46 PM) Bo0o0ody says : هههههههههههههههههههههههههههه

(04:47 PM) Player says : غلطتي اني مختش معايا الشخاره الديجيتل النهارده

(04:47 PM) Player says : جيوبي الانفيه تعبت والله

(04:47 PM) Bo0o0ody says : هههههههههههههههههههههههههههههههههههههه

(04:47 PM) Bo0o0ody says : هههه

(04:47 PM) Player says : عليا الحرام اللي كاتبها بيتناااااااااااااااااااااااك رسمي

(04:48 PM) Player says : ززززززززززززززززززززززززز

(04:48 PM) Bo0o0ody says : عارف بقي مين اللي بعت ززززززز.في الحوار ده

(04:48 PM) Player says : مين

(04:48 PM) Bo0o0ody says : العبد لله

(04:48 PM) Player says : هههههههههههههههههههههههههه

(04:48 PM) Player says : يا ابن العرص يا خول

(04:48 PM) Player says : عليا الطلاق انا اتنبئالك بمستقبل باهر

(04:48 PM) Bo0o0ody says : هههههههههههههههههههههههههه

(04:48 PM) Player says : هههههههههههههههههههههههه

(04:48 PM) Player says : هتوصل يالا راكب مكوك

04:50 PM) Bo0o0ody says : المعرصين بتوع الحزب اتصلوا بيا النهاردة وقالوا عايزيني علشان في اجتماع علشان التعديلات وكده

(04:50 PM) Bo0o0ody says : فقلتولهم مش فاضي وكده

(04:50 PM) Bo0o0ody says : قالوا طب عايزين ناس وكده قلتلهم بسيطة واول واحد جه علي بالي مين

(04:51 PM) Bo0o0ody says : سي ززززز

Bo0o0ody says : انا خلتهم هما اللي يتصلوا بيه

(04:52 PM) Player says : امال كان عامل فيها رجل صاحب موقف ليه

(04:52 PM) Player says : قالوا ايه ؟

(04:52 PM) Bo0o0ody says : ههههههههههههههههههههههههههههه

(04:53 PM) Bo0o0ody says : تلاقيهم لبسوه العمة في الحزب

(04:53 PM) Player says : ههههههههههههههههههههههههههه اساسي

(04:53 PM) Bo0o0ody says : ما هو هناك في اساتذة في الكلام

(04:53 PM) Player says : اه ده كان جاي ولا كأنه مسك الرياسه

(04:53 PM) Bo0o0ody says : اللي ماتعرفوش بقي اني ناوي انشق عن الحزب الوطني

(04:54 PM) Player says : اوباااااااااااااااااااا

(04:54 PM) Bo0o0ody says : ههههههههههههههههههههههههههه

(04:54 PM) Player says : ههههههههههههههههههههههههههه

(04:54 PM) Player says : هتمسك زززززز الرياسه مكانك

(04:54 PM) Player says : هههههههههههههههههههههههه

(04:54 PM) Bo0o0ody says : اه

(04:54 PM) Player says : هتنشق ليه يا ريسنا ؟

(04:54 PM) Bo0o0ody says : كده

(04:55 PM) Bo0o0ody says : فكر جديد بقي

(04:55 PM) Player says : تصدق كلمة "فكر جديد" تمشي زي كلمه " تعريص "

دي اخر مره احاول ازبط التنسيق لان شكلها مش نافعه

Mon, 2007/03/26 - 16:56 — alaa

رحت استلمت

رحت استلمت بطاقتي من قسم العمرانية و عديت على لجنتين بمنطقة الهرم و أدليت بصوتي.

مكانش في قضاة متواجدين، لكن المرة دي الجداول متنظمة أفضل من المرات السابقة و مفيش أي انتهاكات صريحة حصلت قدام عيني، الجو كان هاذئ، اللجان عليها اقبال قليل بس منتظم

Mon, 2007/03/26 - 13:30 — أحمد أبو القاسم (not verified)

الان هناك انتخابات وصندوق انتخابات

انا بأيدك يا علاء على دعوتك لانه شىء رائع جدا ان نلاقي الشعب المصري ايجابي ولو لمرة واحدة فى حياتنا هو إحنا يا جماعة مش عاوزين نقول نعم ومش قادرين كمان نقول لا كل واحد يروح للصندوق ويصوت حسب رغبته نعم أو لا وفي النهاية يبقي كدة كل الناس عملت اللى عليها قدام ربنا وقدام نفسها وقدام الاجيال اللى جايه

في استفتاء وصندوق انتخابات مهما قيل عن التزوير أو التلاعب لازم الناس تشارك وتكون هى الرقيب لان الشعب عندما ينزل الى الساحة ويكون هو الرقيب والحكم والفيصل لا يمكن لاحد ان يتلاعب به او ارداته

ايمن نور حصل على نصف مليون صوت في انتخابات الرئاسة هذا هو حجم ايمن نور وقوته وقدره فماذا ان كانت هناك شخصية ذات ثقل وشعبية في الانتخابات الرئاسية القادمة بدلا من المهاترات التى تخوضها قوى المعارضة فلتتوحد لتجهز بديلا أيا كان اسمة أو منصبه أو شخصة المهم ان تتفق على شخص يستطيع أن يحظى بقبول الناس والامر ليس مستحيلا فهل لا يوجد شخص بكاريزما عمرو موسى بين صفوف هذا الشعب

مشكلتنا كشعب أن التراث والمسلمات مازالت تتحكم فينا فنحن نتحدث عن التزوير كانه من المسلمات او كاننا قطيع يساق بلا ارادة ولا رأى ولا وزن ان كنا جبناء فنحن نستحق الظلم الواقع علينا وان كنا متخاذلين فلا يجب أن نطالب بحريتنا فالخوف لا يصنع الحرية والسلبية لا تجلب الديمقراطية والتخاذل يجلب الانكسار

المقاطعة ضعف والضعف جبن والجبناء يستحقون القهر والكبت والظلم

Mon, 2007/03/26 - 13:17 — أحمد أبو القاسم (not verified)

انا ضد المقاطعة

انا بأيدك يا علاء لان هو ده عين العقل المقاطعة مش مفيده ابدا لان لو فرضنا ان الحزب الوطنى عاوز يزور الاستفتاء يبقي كدة احنا بنشارك فى التزوير دة لاننا امتنعنا عن التصويت لان هناك استفتاء وصندوق انتخابات مهما قيل عن التزوير أو التلاعب فلازم الكل يشارك سواء اللى هيصوتوا بنعم أو اللى هيصوتوا بلا لان الشعب عندما ينزل الى الساحة ويكون هو الرقيب والحكم والفيصل لا يمكن لاحد ان يتلاعب به او ارداته ايمن نور حصل على نصف مليون صوت فى انتخابات الرئاسة هذا هو حجم ايمن نور وقوته وقدرته فماذا ان كانت هناك شخصية ذات ثقل وشعبية مشكلتنا كشعب أن التراث والمسلمات مازالت تتحكم فينا فنحن نتحدث عن التزوير كانه من المسلمات او كاننا قطيع يساق بلا ارادة ولا رأى ولا وزن ان كنا جبناء فنحن نستحق الظلم الواقع علينا وان كنا متخاذلين فلا يجب أن نطالب بحريتنا فالخوف لا يمكن أبدا أن يصنع الحرية والسلبية هي وسيلة الضعفاء والمسيرين

بالله عليكم روحوا صوتوا باللى انتم عاوزينه سواء نعم أو لا تبقوا رضيتم ضميركم وقدمتم شهادتكم وبقينا شعب ايجابي لمرة واحدة فى حياتنا وبلاش ننساق وراء الدعوات العاطفية بالمقاطعة لاننا كدة بنقاطع نفسنا

فليكن شعارنا نعم للتصويت

Sun, 2007/03/25 - 23:55 — محمود سعيد (not verified)

ازاى المصريين

لما انت كاتب أن منظمى الإستفتاء هما المصريين Organizers: المصريين

مين قال أنهم المصريين

أنا وانت عارفين مين المنظمين حرامية مصر ولا إيه رأيك

Sun, 2007/03/25 - 23:51 — محمود سعيد (not verified)

هاقااااااااااااطع

انا مقاااااطع علشان : 1- لأن حسنى مبارك بيصرح فى الجرايد انه بيراهن على المشاركة فى الإستعباط 2- وكمان طنطاوى وحتى عادل إمام طالع يقول المشاركة ، وأنا أول مرة أشوف إستموات منهم على المشاركة بالشكل . 3- يا أخى ده حتى إذاعة القرأن الكريم عمالة تقول روح شارك . 4-علشان أول مرة يكون فى إجماع وطنى من كل المصريين (على إعتبار إن شلة الحرامية مفروض نسحب منهم الجنسية) على المقاطعة . 5- الإخوان والشورى فى المؤسسات السياسية للجماعة إتفقت على إعلان المقاطعة . أسمع كلمة أ.صبحى صالح عن المقاطعة كلمة خطييييرة

Sun, 2007/03/25 - 23:59 — محمود سعيد (not verified)

معلش نسيت أقول

معلش نسيت أقول أ.صبحى صالح عضو مجلس الشعب عن جماعة الإخوان المسلمين وعضو اللجنة السياسية

دائرة الرمل بالأسكدرية

Sun, 2007/03/25 - 23:18 — Anonymous (not verified)

i went to my mom 10 minutes

i went to my mom 10 minutes ago & told her that i wont go to the uni tommorrow & i'd vote , she told me: " na3am ya roo7 omek, balash habal ya bett enty, bokra gam3a... enty FAHMA!! ", ok , really ya3ny, why did they choose that time specifically?, specially that most of the university students r having midterms these days?, maybe coz they know that the youth r most of the people who r willing to vote (i mean vote with No ofcourse), so, ....voila......(Monday), 26/March

ta3geez a7'er 7aga

Sun, 2007/03/25 - 14:50 — طليعة الاحتضار (not verified)

ولاعزاء للاحرار

ايها الاحرار فى هذا الوطن المغتصب سلام عليكم فى اللحظات الاخيرة قبل الدخول فى عصر العبودية المشرعن ودسترة ماليس دستورا كنت اتصور ان تلك التحرشات الدستوريه ما هى الا عقد بين طرفين لفعل الفاحشة من احدهما للاخر بعد فترة اختبار بينهما لمدة 26سنة تقريبا لم يتالم االمفعول به بل كان طول الوقت يتمزز ويغنج بتاوهات قمة فى الاستمتاع بالرغم من تحول الفاعل تدريجيا الى السادية فى الفعل وفى المقابل كان المفعول فيه يزداد استمتاعا وبالرغم ايضا من ان الفاعل خرج عن اطر الممارسة المتعارف عليها الا ان المفعول به كان يتلذذ وخلاص بينما الفاعل رغم كل امراض العنة التى تعتريه والبلاهة والريالة الاانه ظل يمارس ويمارس ويمارس ومع وصوله الى الشبق الشيطانى واراد ان يسلت نفسه اوشعر بانه سينسلت من الحياه واراد ان يرشق من يليه خاف على المفعول به من ان يدرك ويشعر بلحظة السلت والايلاج الجديدة وهو امر يدرك تماما انه لن يؤدى الى شىء الاانه اراد ان يحتاط لكل الظروف فاراد ان يكتب عقدا مع المفعول به حتى يضمن الاستمتاع لمن يليه والتلذذ للمفعول به كانت هذه تصوراتى اليوم بجريدة العربى الناصرى مقال بالصفحة الثانية لرفعت لقوشة بغض النظر عن الالقاب رجاءا ان تقراوه غير كل تصوراتى او على الاقل وسع دائرتها قليلا حيث ان الموضوع يدخل تحت ما اسماه بالشراكة فى الحكم بين مصر واسرائيل بما يعنى ان المفعول به اثبت جدارة واتساعا لقبول فاعلين به على مستوى اكبر من المستوى الداخلى الحالى وبما يعنى ايضا عقد يترك الامور فى يد راسبوتين (الصهيونى)من وراء الستار والمفعول به لاشان له بالامر باستثناء شرزمة قليلة اسميتهم بالاحرار سينوحون بعض الوقت او كل الوقت الا انهم لاعزاء لهم فى نهاية الامر هل لكم التفكير فى اجابة عن السؤال المطروح الان وهو ماذا بعد انتهاء العاصفه الكذابة او الدوامة الخادعة ؟كيف ينتبه المفعول به ؟هل هناك استعداد للتضحية بالعمر من هؤلاء الاحرار؟ هل يدرك هؤلاء الاحرار انهم يقايا الثيران التى اكلت منذ زمن بعيد ؟وهل الاخرار كبقايا للثيران لهم وجود حقيقى ومؤثر على ارض الواقع وهل تاثيرهم فعال ويحدث تغيير ملموس وغير سلحفائى ؟ياالله الهم انا نشكو اليك ضعف قوتنا وقلة حياتنا وهواننا على الناس يا ارحم الراحمين انت رب المستضعفين وانت ربنا الى من تكلنا الى بعيد يتجهمنا ام الى عدو لكته تمرنا ان لم يكن بك علينا غضب فلانبالى ولكن عافيتك هى اوسع لنا نعوذ بنور وجهك الذى اشرقت له الظلمات وصلح عليه امر الدنيا والاخرة من ان تنزل بنا غضبك او يحل علينا سخطك لك العتبى(الرضى ) حتى ترضى ولا حول ولاقوة الابالله (

Sun, 2007/03/25 - 11:31 — أحمد اللي عايش في الزقازيق (not verified)

إلى الجماعة

إلى الجماعة اللي بيقولوا نهم مش رايحين علشان الاستفتاء هايتزور و علشان النسبة تبقى قليلة و يفضحوا النظام:النظام لو هايزور نتيجة الاستفتاء مش هايعرف يزور نسبة الحضور و يخليها 60 او 70%؟ لو كانت المعارضة قالت نروح و نقول لأ كنا نعرّفهم و نعرّف نفسنا مين الأغلبية اللي بجد احنا و لّا هما

Sat, 2007/03/24 - 19:26 — ركانة حمور (not verified)

دي دعوة شخصية

دي دعوة شخصية مني لعدم المقاطعة، روحوا دوائركم الانتخابية و ارفضوا التعديلات الدستورية.

تحية طيبة و انا ادعم هذه الدعوة فقد تعتبر الحكومة المقاطعة كما المثل القائل الجامع مسكر ...بركة اللي جت منك يا جامع

فالمقاومة تحتاج ان يقف الانسان على الارض بقوة و يتشبث بموقعه و ربما من هذا المنطلق تقدمت منذ يومين بالترشح لمجلس الشعب في بلدي (و ان كان من المحتمل جدا ان يتم خرق الدستور و عدم قبول ترشيحي ) و لكن يبقى ان المواجهة و الصراخ بأقوى صوت ب لا أقوى أثرا من الانكفاء فيرتاح الأخرون منا و يرتاحون من سماع اصواتنا

دمتم بكل الخير

Sat, 2007/03/24 - 16:04 — الأغلبية الصامتة (not verified)

أم المصايب

حزنك ماليني ياست الحبايب ياللي ترابك ماليان عجايب يامصر إصحي وفكي اللجام ده انتي حبيبتي واعز القرايب ياأمي يامصر ياغالية عليا إصحي ودوسي برجلك مصايب حطوا في إديكي السلاسل ياأمي وانتي حرة برغم المصايب حافضل ابكي عليكي بدموعي واندب عليكي ياأمي ندايب شلة من ولادك حقيقي جبابرة واخدينك يامصر ياأمي سبايب بيسبوا في شعبك ومصوا دمه وخلوا نيلك ونخلك خرايب ضربوا ولادك وهانوا الجميع وعبوا كرمك وخيرك زكايب بيعدلوا الدستور أخيراً ياأمي عشان ماتكتر فيكي الزرايب ويجف نيلك وتنشف مزارعك ويحطوا في كل ركن من أرضك سدايب عيني عليكي يامصر ياأمي ياأغلى ماف حياتي برغم المصايب

Sat, 2007/03/24 - 11:55 — Anonymous (not verified)

لا للمقاطعة .... لا للتعديلات ..... نعم لحرية الشعب

أول مرة أتفق معاك .... لازم نروح و نقول لأ ...... لو مارحتش هيزورا صوتك ..... ليه نديهم الفرصة ...... ياريت أكبر عدد يروح و الله هينكشفوا خاصة لو القضاة ما قاطعوش الإنتخابات ..... يا جماعة كفاية سلبية و خطب و نشرات .... كفاية مقاطعة

Sat, 2007/03/24 - 08:04 — عبدالله السيد (not verified)

سؤال خبيث؟؟؟

هل لدينا قوات مسلحة (جيش) مثل الجيش الموجود في دولة موريتانيا الشقيقة؟؟؟؟؟؟؟ أذا كانت الأجابة -- بنعم !! طيب هو كان فين أمبارح؟ قد يسأل ساءل -- لماذا بالذات أمبارح؟؟؟ أقول لأنه كان في تركيا وقد يقول آخر .... ما هو كل يومين ناطت في حته؟ لماذا تسأل عن الجيش بالذات "أمبارح" اقول ... خلاص بصراحة ...في التعديلات الدستورية زودوها حبتين وتلاته واربعة والف

Sat, 2007/03/24 - 05:18 — أشرف نصر

المقاطعة الحقيقية من الناس

مش عارف يا جماعة هوه اصلا الناس مركزة ان في حاجة يوم الاتنين غير انها فرصة يزوغوا بدري او ما يروحوش الشغل او حتي يتورطوا ويقعدوا مع ناس فاضية لآخر النهار اظن الناس مركزة اكتر ماتش الاهلي وبرشلونة امتي احيانا بقول يا ريت كفاية واخواتها ما طالبوش من 2004 بتعديل الدستور وارجع اقول وهما الجبابرة دول كانوا مستنين طلبات من حد بجد متلخبط ونفسي اصرخ زي نور الشريف في سواق الاتوبيس يا ولاد الكاااااااااااااااااااااااااااااااااااااااااااااااااالب

Sat, 2007/03/24 - 03:56 — BeLiEvEr (not verified)

للمره الخمسمايه لازم نروح

الكل لازم يروح و يقول لأ يا إما يبطل صوته إنه يسود الخانتين، المهم كله يروح، ليه؟ حأقولكم انا ليه للمره الخمسمايه

أولا، لما نروح و نقول لأ حتبقى حافظنا على أصوتنا، و مسمحنلهمش إنهم يزوروها، لأن الناس اللى بتقول إن الإستفتاء كده كده حيتزور، أحب أقولهم إن اللى حيتزور أصوات الناس اللى مرحتش، إنما اللى حيروح صوته مش حيتزور، يعنى إحنا لو مرحناش بنديلهم الفرصه إنهم يزوروا أصواتنا إحنا . ثانيا، كل الناس اللى حتروح حتقوم بدور المراقب للإستفتاء، و يا ريت أى حد معاه كاميرا او موبايل بكاميرا ياخدها معاه، و يسجل اللى بيحصل فى دايرته، و كل ما فيه ناس كتير حتروح، كل ما حنكشف أساليب تزويرهم، و يبقى عندنا الداتا اللى ممكن نفضحهم بيها فى كل وسائل الإعلام العالميه (لأن للأسف هى دى اكتر حاجه بتخوفهم)

ثالثا، لازم كلنا نبطل سلبيه و نبتدى نشارك بقوه، ده تمرين على المشاركه و إن الناس تبطل سلبيه. صدقونى لو الشعب ده بطل سلبيه، حاجات كتير حتتغير و حيبتدوا يتعاملوا إن فيه شعب بدل ما هوه مغيب كده من كل حاجه.

يعنى بصراحه أنا مش شايف أى سبب ممكن علشانه منروحش!! كله يروح و بلاش سلبيه.

Fri, 2007/03/23 - 18:49 — Anonymous (not verified)

ايجابيات

ايجابيات المشاركة وعدم المقاطعة

انك تجرب الشعور الممتع بأنك قادر على التعبير عن رأيك بصرف النظر عن النتيجة.
انك تعذر نفسك أمام ربنا لما يسألك عملت إيه عشان عرض بلدك مينُتهكش.
انك تكون حجه على اللي قعد واختار انه يشوف المنكر ويسكت بحجة إن مفيش فايده وتفكره انه مطالب بالعمل مش بالنتيجة.
انك تقيم الحجة على المزورين بدل ما يملوا ورقه فاضيه يزوروا ورقه مليانه وتبقى مصيبتهم كبيره قدام ربنا.
انك تحيى الأمل في نفوس العيال الصغيرة إن فيه حد كبير ببقول لأ.. فلا تكون سلبية يشب عليها الصغير ويشيب فيها الكبير.
انك تقول للناس إن اللي عملوه أعضاء مجلس الشعب المعارضين- سواء اللي حضر منهم ورفض وألا اللي اثبت معارضته واعتصم- إنما كان تعبيرا عن ملايين المواطنين اللي انتخبوهم رغم انف النظام الوسخ.
انك تقول لنظام مبارك (أحه يا عرص) مخفناش من الحكم على عبد الكريم بسنة حبس لإهانة الرئيس ولا من تحويل الإخوان للمحاكم العسكرية ومصادرة أموالهم..أنت محتاج ل 72 مليون سنه حبس عشان تخوفنا

Fri, 2007/03/23 - 18:10 — نوارة (not verified)

قول كده وانا اقول

والله يا علاء كلامك مقنع جدا

وانا اميل للكلام اللي انت بتقوله

ورغم اني كنت مترددة هل اشارك المعارضة في المقاطعة

وللا اروح واقوم بواجبي

بس بصراحة انت كلامك شجعني لان هو ده الكلام الصح

طيب بص

انا مواليد 73 يعني من ايام الفراعنة

ايه بقى

انا ما عنديش بطاقة انتخابية

بس انا باشتغل في التلفزيون ومتهيالي مسجلة في قوائم التلفزيون

ايه بقى

اعمل ايه يعني عشان اتأكد اني لازم اشارك

انا ساكنة في الخليفة المأمون هل اروح القسم اللي تبع المنطقة بتاعتي

وللا اروح لجنة التلفزيون

واحد قال لي الناس الشبهة امثالنا التلفزيون مش بينزلهم في القوائم

طيب اعمل ايه عشان اعرف انا متسجلة فين

او اسجل نفسي ازاي

او ايه؟

قول كده وانا اقول؟ بس والنبي ما تطنش عشان انا فعلا عايزة اشارك

Fri, 2007/03/23 - 19:06 — alaa

مفيش أمل تكوني

مفيش أمل تكوني متسجلة تبع السكن، انزلي لجنة التلفزيون يوم الاستفتاء و دوري على أسمك في الكشوف، لو مليقتيهوش يبقى مش مسجلة، خليكي موجودة في اللجنة و أحيكيلنا فيه قاضي ولا لأ، حجم الحضور، فيه حبر فسفوري ولا لأ، فيه موظفين بيتحشدوا ولا الناس بتيجي بمزاجها الخ.

Fri, 2007/03/23 - 18:07 — nono (not verified)

انا مش فاهمة

انا مش فاهمة ياعلاء لو سمحت فهمنى ليه لما اقاطع الاستفتاء ممكن صوتى يتسرق باحتمالية اكتر من لو مش رحت اللى انا فاهماه انى لما بروح بتحسب فرد وراى هو اللى بيتزور يعنى لو 10 راحو بيكون اللعب والتزوير فى عشرة اصوات برده مش 100 انا لما اقاطع اكون بقلل العدد اللى ممكن يتلعب فى رايه ولا ايه ؟؟؟

انا بجد مش فاهمة هما عرفوه يربكونه بالسرعة اللى اتعمل بيها الموضوع بلييييييييييييييز علاء فهمنى وجهة نظرك؟ وايه فايدة انى اروح اراقب ؟ اراقب ايه؟

وايه الفايدة من كده اللى انا ممكن افهمها ؟

وميرسى ليك ولمنال

Fri, 2007/03/23 - 19:16 — alaa

بصي يا

بصي يا ستي

أولا أي حد مسجل ممكن صوتوا يتزور، حتى لو كان ميت.

لكن بسبب رقابة القضاء و وجود بعض شوية قضاء نزيه ميقدروش التزوير يبقى عبارة عن نتيجة نهائية و السلام، لازم يفبركوا تفاصيل يعني لازم يفبركوا أصوات.

طيب لما تروحي تشاركي بيتسجل أسمك ضمن المشاركين، كده تبقى حرمتيهم من استخدام اسمك في فبركة الأصوات (خصوصا لو المراقبة منعتهم من العبث في صناديق الانتخابات) و لو حصل أنهم استخدموا اسمك في لجنة أخرى هيبقى فيه وثائق تثبت أن صوتك استخدم مرتين و دي نوعية الوثائق اللي بتسمح للقضاء أنه يرصد التزوير.

دلوقتي لو أنتي شاركتي بطاقة التصويت اللي استخدمتيها هتدخل في صندوق و لازم يتحسب، لو فيه قاضي نزيه ماسك لجنتك و قدر يحد من التزوير و الاستهبال و كان فيه نسبة مش بطالة قالت لأ يبقى نتيجة اللجنة دي هتعبر عن أن فيه ناس قالت لأ. و دي حاجة برضه مهمة.

بعيدا عن ده كله، واضح تماما أنك مش فاهمة النظام ماشي ازاي صح؟ طيب لو رحتي شاركتي و قضيتي وقت في اللجنة يبقى يمكن تتعلمي و تفهمي شوية النظام ماشي ازاي و يمكن تقابلي مراقب حقوقي أو قاضي نزيه أو مواطن جاي مهتم أو حد من حركة كفاية أو من الأخوان أو من أي فريق سياسي آخر و تتكلموا و تتعلموا من بعض

Fri, 2007/03/23 - 07:54 — عبدالله السيد (not verified)

دعارة سياسية

ما قام به أعضاء مجلس الشعب من موافقة علي تعديلات دستورية يعتبر "دعـارة سـياسـية " بكل ما تحتوية هذه الكلمة من اسفاف وتدني في لغة الخطاب. لا استطيع ان أتخيل أنهم -- أقصد -- أعضاء مجلس الشعب -- مصريون مثلي ومثلك -- لا يمكن ان يكونوا الا حـثـاله مجتمع أفـرزهم نظام نـخـر فيه السوس حـتي النخاع -- نعم هم "زبالة" القوم --نعم هؤلاء في أذانهم وقرا-- ولن يستمعوا الي قول رشيد لأن ليس فيهم رجل رشيد -- انني اطالب بمحاكمة كل هؤلاء الاعضاء-- التي تستحق البتر --بتهمة خيانة الامانة - وهم قد خانوا الامانه من اول يوم بعد أنتخابات مجلس الشعب -- عندما تحولوا من مستقلين اخذوا صوتي وصوتك علي هذا الاساس ثم هرولوا الي حزب الخراب الوطني لينعموا بذهب واموال مصر واموال الفقراء من هذا الشعب. أطالب بمحاكمة فتحي المغرور الشهير بسرور بتهمة " افساد الحياة السياسية المصريه علي مرور ربع قرن من الزمان. أطالب بمحاكمة رأس الدوله المصريه -- ولن استطيع سرد التـهــم الموجهة لـسـيـادته -- "فـهـم كـثـر"- كما اطالب بمحاكمه الشعب المصري -- وانا اولهم -- بتهمة الخنوع وتعريض" أمنا" كلنا "مصر " للدعارة السياسية -- ان يفعل فيها وبها الفاحشة علي مرآي ومسمع من 72 مليون -- ينتهك عرضنا كلنا علي فراش مبارك وغيره من حاشيته دون ان نحرك ساكننا-- غير -- الكتابة من خلال المنتديات مع عدم انكاري للفعل والاثر الطيب البطيء الذي تتركه للحظات معدوده في نفس مثقلة بأعباء تنوء بها العصبة أولي القوة ز أطالب بمحاكمة "القضاة" كلهم لتقاعسهم عن القيام بمحاكمه مبارك وعصابته وانشغالهم بهمهم الشخصي الفئوي من تحصيل مغانم وأستثناءات فئوية لزيادة رصيدهم من اموال علي حساب الشعب الفقير المهان -- وياأخوتي في الله -- أذكركم ان اول من اخترع التويث في مصر كانوا "القضاة" بتوريث أبناءهم الوظائف القضائيه لأبناءهم. هؤلاء هم اول من باعوا الشرقاوي ومالك عندما تضامنوا مع القضاة سابقا

لاخير في كثير من نجواهم -- أقصد القضاه -- الا من امر بثورة شعبية لا تبقي علي الارض من الظالمين ديارا

Fri, 2007/03/23 - 05:05 — Anonymous (not verified)

أنا بحاول اوصل

أنا بحاول اوصل لبيان كفاية بتاع المقاطعة على الموقع الرسمي بتاعهم ومش لاقي هما أعلنوا فين المقاطعة وليه منزلوش على الموقع بتاعهم انهم مقاطعين ؟

Fri, 2007/03/23 - 01:46 — ألف

"لا" أو "باطل"

رأيي أن الواحد إما يقول لا، أو يبطل صوته لو عاوز يثبت موقف الاعتراض على الاستفتاء و التعديل.

الغياب و الامتناع مش محسوسين، و بالذات أن أصلا معظم الناس مش بتروح، و نسب المشاركة ضعيفة، و سهل جدا إعفال التركيز على نسبة المصوتين إلى المسموح لهم بالتصويت.

خطر التزوير قائم دائما، لكنه بيزيد أكيد بالغياب.

إبطال الصوت حل كويس للعاوز يعترض و يثبت موقف.

و الحقيقة أن الإبطال علشان يكون فعال لازم يكون من عدد كبير و مؤثر و إلا هيعدي على أنه خطأ؛ يعني لو كانت كفاية و الإخوان دعوا له كان أحسن. لكن أضعف الإيمان هو أن لا تترك فرصة لاستغلال صوتك في التزوير.

الإبطال بيكون بتسويد الخيارين معا، مش بترك الورقة فاضية.

و ممكن كمان تكتب أي كلام أنت عاوزه أو تسب الرئيس. فرصة هايلة.

Fri, 2007/03/23 - 02:02 — AMS

تصدق من غيظى

تصدق من غيظى عملت كده فى انتخابات الرئاسه اللى فاتت وجبت الورقه بالطول والعرض شتايم وشخبطه

Thu, 2007/03/22 - 17:28 — أبو جمال طبعاً (not verified)

عزبة ابو جمال قدرت تعملها

عليكم بتطوير انفسكم والاستفادة من تجربة عزبة أبو جمال يا غجر http://elezba.blogspot.com/ هاتشوفو الزبد

Thu, 2007/03/22 - 16:30 — Anonymous (not verified)

معلشى يا علاء

معلشى يا علاء أنا مش معاك خالص . مقاطعة الاستفتاء مش خطوة سلبية دى الخطوة الايجابية الوحيدة فى ضوء المتاح. كلنا عارفين النتيجة مسبقا وعارفين ان منظمات المجتمع المدنى عمرها ما حتقدر تثبت ان الاستفتاء متزور وعموما الرد جاهر بعض الأحداث الفردية مش حتأثر فى الحاجة نزيهة. الحاجة الوحيدة اللى يقدر المراقبين من المجتمع المدنى يكلموا فيها هى نسبة الحضور. وطبعا كل ما زادت نسبة الحصور كل ما ده صب فى صالح الحكومة. وبعدين المقاطعة كمان وسيلة لاثبات موقف زى بالضبط أعضاء مجلس الشعب اللى قاطعوا الجلسات وفضلوا يقفوا يتظاهروا ويثبتوا موقفهم. ما كان ممكن يحضروا الجلسات وكانوا حيهاتوا والنتيجة واحدة ومعروفة مقدما. على الأقل انت كده بتثبت موقفك بدل ما تتوه فى الأغلبية الساحقة اللى حتتطلع مؤيدة طبعا. وبعدين يا علاء معلشى إذا كانت كفاية وأحزاب المعارضة حيقاطعوا وكمان القوى المعارضة الوحيدة اللى بتقدر تحشد الناس وهى الاخوان حتقاطع يبقى مفيش أى معنى لمحاولة حشد 100 أو 200 واحد انهم يروحوا يدلوا بصوتهم . النتيجة الوحيدة ان ال 200 واحد دول حيحسنوا صورة الحكومة؟

Thu, 2007/03/22 - 18:13 — alaa

نرجع ثاني و

نرجع ثاني و نقول، ازاي بعض ألاف هينجحوا في تحسين صورة الحكومة؟ المشاركة المفروض تكون بعشرات الملايين بعض ألاف مش هيفرقوا (ده لو وصلنالهم).

لكن لما الكام ألف اللي ينزلوا دول يبقوا خدوا خطوة ايجابية ده ممكن يشجعهم يبدأوا خطوات ثانية و يشاركونا.

أما موضوع اثبات الموقف، مش فاهم هتثبت الموقف ازاي؟ نواب المجلس عددهم معروف و انسحبوا من الجلسة بعد دخولها و أمام الاعلام و اعتصموا في الشارع أمام الشعب، مش قعدوا في بيوتهم. ممكن تشرحلي ازاي هنعلن موقف؟ ازاي أفرق ما بين مواطن طنش المرة دي زي ما طنش كل مرة و مواطن واخد موقف و مقاطع بناء على دعوة المعارضة؟

ثم ايه قيمة اعلان الموقف؟ اشرحلي هيخلي المعارضة أقوى ازاي؟ هيترتب عليه ايه اعلان الموقف ده؟

Sat, 2007/03/24 - 15:03 — Anonymous (not verified)

اسمح لى أرد على

اسمح لى أرد على سؤالك بتاع ازاى اقرق بين مواطن طنش ومواطن ما راحش عشان رافض بسؤال: ازاى افرق بين مواطن راح وقال آه ومواطن راح وقال لأ وكلنا عارفين ان الصناديق ممكن تتبدل وان النتائج اللى على مزاجهم حيعلنوها. انا مثلا فى دايرتى فى انتخابات مجلس الشعب الأخيرة كان معروف اثناء الفرز مين الاتنين المتقدمين وفجأة اعلنت النتائج بفوز ثنائى الحزب الوطنى اللى كان من شوية واقف عند 500 صوت. وصوت أى واحد قال لأ أو حتى أبطل صوته ممكن يتقلب ل آه بمنتهى البساطة. تسمح تقولى بقى أروح ليه؟ عشان تبقى نسبة الحضور كويسة؟ طيب معلشى سؤال كمان؟ لو احنا بلد محترمة هل نسبة الحضور فى اى انتخابات او استفتاء حتبقى 20 %. النسبة مش حتقل عن 60%. طيب الحضور القليل-الناس المطنشة دى زى ما بتقول - هل كانت كلها حتطنش فى كل الحالات؟ لأ.. فيه نسبة كويسة لو كانت واثقة فى ان فيه امل فى اى حاجة كانت راح ت. النسبة دى رغم انى ما اقدرش اقول عليها معارضة للحكومة إلا انى ما اقدرش اقول عليها مؤيدة. الأغلبية الصامتة المطنشة دى مش ف صالح الحكومة برضه. وأكر دليل ان النظام عايز الناس تروح بأى وسيلة الشيخ الفاضل اللى قالك اللى مايروحش يبقى كاتم للشهادة وفضيلة شيخ الأزهر اللى قالك ان المواطن الصالح هو اللى يحضر ويوافق !! بالنسبة لفايدة ده للمعارضة: لو سمحت قارن لى بين الخبرين الجايين دول: 1- أقيم الاستفتاء اليوم بحضور غير مسبوق وصل ل 70% وكانت نتيجته 90% وافقوا و8% رفضوا و 2% أصوات باطلة وقد اعترضت المعارضة على الاستفتاء وشاركتها منظمات المجتمع المدنى التى أكدت على التزوير إلا أن الحكومة أكدت ان ما حدث هو بعض الحالات الفردية لكن الاستفتاء هذه المرة تميز بالنزاهة والشفافيةو.... وأكد السيد المسئول فلان الفلانى أن نسبة الحضور العالية هذه المرة ما هى الا انعكاس لثقة المواطن العادى فى نزاهة و ....الاستفتاء وايمانه بجدوى مشاركته خصوصا بعد التطورات الملموسة فى.... والتى هى انعكاس ل .... بلا بلا بلا. وبين الخبر ده:2- أقيم الاستفتاء وكانت نسبة المشاركة ضعيفة كما هو معتاد وأعلنت الحكومة ان نسبة الحضور كانت 40% وكانت النتيجة.....بينما اكدت المنظمات المراقبة للاستفتاء ان نسبة الحضور فى معظم الدواير لم تتعد ال 25% ورغم مقاطعة معظم أحزاب وحركات المعارضة للاستفتاء إلا أنه يعتقد ان عزوف الناس عن الحضور ليس استجابة لها وانما هو ناتج عن عدم اقتناع المواطن العادى بجدوى المشاركة أو انعكاس هذا على حياته بأى شكل من الأشكال و....

ممكن تقول لى بقى ايه اللى أحسن؟ ايه اللى ممكن يضفى مشروعية اكتر للاستفتاء وللتعديلات الدستورية؟ نسبة حضور كويسة وتزوير النتيجة وابقى اثبت بقى انها اتزورت وشوف مين اللى حيسأل فيك بقى حتى لو اثبت؟ ولا عزوف الناس عن الحضور لأى سبب من الأسيباب سواء نتيجة لمعارضتهم للتعديلات أو نتيجة لاعتقادهم ان كل ده تمثيل أو كلام فاضى أو لأن دول ناس فى السحاب ويا عم خلينا احنا فى اكل عيالنا أو ... أو ...؟ معلشى متأسفة على الرد الطويل

Sat, 2007/03/24 - 21:49 — alaa

الدوائر

الدوائر الانتخابية اللي كان فيها حضور قوي للمعارضة في مجلس الشعب و اتزورت هي الدوائر اللي اتعمل عليها فضائح كبيرة، الدوائر اللي المعارضة مشاركتش فيها خالص أو حضورها كان ضعيف منعرفش عنها حاجة و شكلها كأن الحزب الوطني كسبها بنزاهة.

بالعكس مشاركتنا مهمة عشان نفضحهم، يمكن بختك يخبط في قاضي محترم، لو قاطعنا يبقى مفيش حاجة القضاة المحترمين يعملوها أصلا غير أنهم يعدوا أرقام الحضور.

ثانيا تصو أن الدولة فعلا عاوزة الناس تشاكر تصور هزلي، هما مش عاوزين دوائر فاضية على الآخر لكن مش عاوزين الناس تشارك بجد، بدليل العوائق اللي بيحطوها على التسجيل و محاولاتهم الدائمة لتسويف المسجلين تلقائيا و لو أنت كنت نزلت و جربت و شفت بعينك في الاستفتاء اللي فات و انتخابات الرئاسة و انتخابات مجلس الشعب كنت رصدت ده بنفسك.

Thu, 2007/03/22 - 15:51 — Anonymous (not verified)

المشكلة

الفايدة الوحيدة في وجهة نظري من المشاركة هي المراقبة , بس السؤال هل هيسيبوا حد يقعد في الدايرة و يراقب؟ و ايه امكانية أن الناس تدخل تراقب من غير ما تشار؟, يعني تقاطع و تراقب

Thu, 2007/03/22 - 14:20 — GaBoR

انا مبإتش فاهم

انا مبإتش فاهم حاجه ماهو لو رحنا اصوتنا هتتسرق و يحسبوا مجرد حضورك موافقه و تترمي ورق الرفض في المحارق و لو مرحناش هيقولوا علينا سلبيين مش فاهم حاجه لو سمحتوا مساعده الحاجه الوحيده اللي انا قررتها الان انني هشارك في الاعتصام بميدان التحرير

Thu, 2007/03/22 - 14:37 — alaa

مين قال أن

مين قال أن احتمال أن صوتك يتسرق أكبر لو رحت؟ بالعكس تماما احتمال أن صوتك يتسرق أقل لو رحت لأن ممكن وقتها القاضي الموجود يعد صوتك.

عموما ايه رأيك تروح تراقب و تحاول تفهم الموضوع ماشي ازاي على الأقل؟ بغض النظر عن هتشارك في التصويت ولا لأ.

Thu, 2007/03/22 - 03:34 — so7ab (not verified)

المقاطعة مش حل

كتير بختلف مع الكلام اللى شايف ان المقاطعه السياسية فى اوقات مش حل سياسى لكن كمان اللى بيتم الدعوة ليه ده بجد استسهال

افهم انك تكون معترض على شرعية شىء فمتشاركش فيه وتكون قادر معاه على صنع شىء بديل يبرز عدد المقاطعين وروئيتهم وموقفهم اما ان الناس تقعد فى بيتها وتقول مقطعين ده اسمه تهريج

خلينا ننزل ونقول لا ونكلم الناس - جيرانا زمايلنا فى الشغل فى الدراسة - نقولهم احنا ليه بنقول لا خلينا مره واحدة ننزل ونجرب وكفايانا مقاطعة

Thu, 2007/03/22 - 01:55 — شريف (not verified)

كلامك صحيح

كلامك صحيح جداً و مطالبة الأحزاب الدائمة بالمقاطعة أمر سخيف و أسلوب قديم و غبي في رأيي الخاص. على الأقل لو حايزوروه في كل الأحوال يبقى عودنا الناس تهز طيزها شوية و تتحرك و تتنيل تعمل أي حاجة !!

- هل من حق مواليد ما قبل 1981 استخراج بطاقة انتخابية الأن، و لا خلاص ميعادها راح و مالوش حق التعديل ؟

- أخويا و اختي مواليد ما بعد 1982، بس في تضارب في الكلام بينك و بين موقع أًصواتنا .. هل يذهبوا ببطاقة الرقم القومي يوم االاستفتاء مباشرة أم يجب أن يذهبوا لاستلام بطاقة الانتخاب الوردية قبلها ؟

Thu, 2007/03/22 - 02:36 — alaa

و أدي الأخوان

و أدي الأخوان انضموا كمان للمقاطعة و محدش عمل دعوة و لا تنظيم للمراقبة، يعني سايبينها للوطني تماما.

اللي معملش بطاقة انتخابية خلاص راحت عليه، يا ريت تفتكر تعملها لما يتفتح الميعاد ثاني بغض النظر عن فيه انتخابات قريب ولا لأ.

بالنسبة لمواليد 1982 و ما فوق، نظريا تقدر تنتخب ببطاقتط الشخصية في اللجنة اللي أنت مسجل فيها بعد ما تلاقي أسمك في الكشوف، المشكلة أن الكشوف مسخرة و مفيش قاعدة لمن يتم تسجيله و من ما يتمش و من يتم تسجيله فين و فيه كثير مسجلين بأسماء ثنائية و ثلاثية فقط و بالتالي ممكن تلاقي صعوبة شديدة في لو حاولت تدلي بصوتك اعتمادا على البطاقة الشخصية فقط.

لو معاك البطاقة الانتخابية تقدر تروح أي لجنة مش بس لجنتك و مفيش اللبس بتاع الكشوف ده.

مش متأكد اذا كان لسه ممكن المسجل يستخرج بطاقته الانتخابية لحد دلوقتي ولا لأ، المرة اللي فاتت الحكومة كانت مهتمة تعمل مسرحية متكاملة و بالتالي الداخلية كانت بتعمل اعلانات دورية قال ايه بتشجع الشباب يشارك و كان فيها التفاصيل دي، لكن المرة دي المسرحية متكروتة و مش فاهم حتى واجعين دماغهم يعملوها ليه.

Thu, 2007/03/22 - 00:23 — أحمد اللي عايش في الزقازيق (not verified)

قصة حقيقية

أنا عايز أروي قصة حكاها واحد معرفة و حلفني مش أقول لحد و أنا مش هاقول لحد الراجل الطيب ده موظف في الدولة و كان حظه انه يكون مشرف على استفتاء المادة 76 فى دايرة من الدواير الفرعية بيتهيألي المهم اليوم عدى و مافيش غير 3 او 4 بس اللى راحوا قوم ايه......الضابط بتاع امن الدولة يساله "كام واحد ادلى بصوته"فقال الرقم رد امن الدولة و قال" نعم يا روح امك انت مش ناوي تروح و لا ايه النهارده؟ ما انتاش مروح غير لما تملا الصندوق اضطر الراجل المعرفة انه يملى بنفسه 400 ورقة و حطهم فى الصندوق و قفل عليهم انا مش باعذره لكن دي طريقة من الطرق اللي بيها بيزوروا ارادتنا و يستفيدوا من السلبية فى انهم يعملوا اللي يعملوه انا من مواليد 88 و هاروح اجيب بطاقتي الحمرا من قسم ثاني الزقازيق علشان اروح و اقول لهم لأ مش عاجبني سلق البيض اللي انت م عملتوه ده و يا سلام لو لقيت ان اسمي متعلم قدامه و لا حد ماضي وقتها هاعمل محضر و اولع الموضوع غلط ان احنا نقاطع لان احنا كده مش فرقنا عن الناس المكبرة اللي مش ليها لا في الطور و لاالطحين لما اقرا للاستاذ مجدي مهنا بيقول انه يدعوا للمقاطعة كنوع من الرفض مش فاهم ازاي يرفض و هو مش ادلى برأيه اصلا يوم الاتنين هيكون اول ممارسة ليا في حق التصويت و هاقول لأ يا عمو حسني اللي انت عايزه مش عاجبني لو فاجئنا الشعب المصري و 70 % قالوا لأ هيزوروها ازاي غلط يا جماعة ماحدش يقاطع

Wed, 2007/03/21 - 23:51 — محمود سعيد (not verified)

طيب ليه نقاطع

انا مش فاهم لحد دلوقتى طيب ليه نقاطع

لذلك لحد دلوقتى لازم نشارك انا رأيى من رأيك يا علاء

Wed, 2007/03/21 - 23:27 — Anonymous (not verified)

عز الطلب

طبعا ان الناس تروح وتشارك منى عين نظام الحكم ومش عايزه اكتر من كده لان هى كده كده هتزور وكلنا مقتنعين بكده لكن الاهم ان مرواحنا هيكسب الموضوع شىء من الشرعية ويبقى فرصة انها تقول امام العالم كله اهه الشعب جه وشارك وقال نعم يعنى كل شىء بالقانون وشرعى يعنى المشاركة احسن غطاء للنظام لتسهيل عملية التزوير وكله بالقانون ثم ان المشاركة كامر ايجابى ومطلوب فى الاستفتاء عل تعديلات هى قمة فى الفجور يعنى نكون نحن اول من يزاوج بين الشرعى وغير الشرعى فما هو شكل الجنين الناتج عن تلك المزواجة لاتذهبوا يرحمكم الله فالتزوير قائم قائم والمشاركة مبرر قوى منكم بان كل شى برغبة الشعب عموما انا كررت كلامى لعل التكرار يعلم بنى وطنى الشطار المغلوبون على امرهم

Wed, 2007/03/21 - 23:39 — alaa

النظام اتفضح

النظام اتفضح تماما من زمان و مفيش أي حد لا داخليا ولا دوليا عنده أدني شك أن النظام ممكن يبقى نزيه، و عدم مشاركتنا لن يفضح أي شيئ زيادة يمكن لما ننزل نراقب نقدر نفضح أكثر.

ده أولا ثانيا فضح النظام دوليا مشكلهوش له أي قيمة، النظام حابس أيمن نور و طلعت السادات و بيحاكم الأخوان عسكريا و قتل خمستاشر في الانتخابات التشريعية و مأجل الانتخابات المحلية و مزعل القضاء و مفضوح تماما في انتهاكه لحقوق الانسان و فساده و مع ذلك كل ده لم يؤثر أي تأثير.

و بالعكس عدم مشاركتك بيعلي احتمال أن صوتك يتم استخدامه في التزوير.

مش شايف أي مكسب من المقاطعة بصراحة، و مش شايف أي خسارة من المشاركة.

طيب نيجي بقى لمكاسب المشاركة.

أولا لما نطلب من الناس تشارك يبقى بنطلب من الناس أنها تنخرط في عمل سياسي رافض للنظام، لما نسبة ما من الناس تنزل تشوف بنفسها المهزلة نبقى فضحنا النظام داخليا فضيحة أكبر بدل ما هو كلام مرسل و مجرد بقيت تجربة عاشها الفرد.

و بعد ما تشارك و تشوف بنفسك العدد الصغير المشارك و تقارن ما بين ده و ما بين ما سينشر احتمال تتشجع تشارك كفاية في خطوات أخرى، يعني تبقى دي أول خطوة ايجابية.

المشاركة فرصة لأننا نتعلم و نجند و نوسع نفسنا و نفهم حجمنا الحقيقي و نقابل بعض الخ.

و بعدين ممكن أفهم ليه بنقاطع الاستفتاء ده لكن بنشارك في انتخابات مجلس الشعب؟ ما كله فيه تزوير و كله مبني على باطل و كله نتيجته معروفة مسبقا؟ ليه بنشارك في انتخابات اتحاد الطلبة و النقابات العمالية؟ و ليه أصلا بننزل مظاهرات لما أحنا عارفين أن اللي هيشاركونا في أحسن الأحوال كام ألف؟ بنعمل ده كله عشان دي خطوات ايجابية بنبني نفسنا فيها و نتعلم منها و نوسع دائرتنا كله بناء للمستقبل.

Thu, 2007/03/22 - 09:14 — Anonymous (not verified)

النمطية

الايجابية لاتعنى فقط المشاركة فى التصويت والا نكون نمطيين لما لاتكون الايجابية هى عدم المشاركة هذه المرة تخيل لولم يذهب احد الى الاستفتاء اطلاقا باستثناء المضحوك عليهم وعدم الذهاب هنا يكون معناه الرفض للمبدا والفكرة نحن هنا ولن نعطيكم الفرصة لتستغلوا ذهابنا اللى اللجان بالضبط كمن يعترض على امرما ولايشارك فى اى شى يقترب من هذا الامر حتى لايفسر موقفه علىانه قد يتغير يوما ما ويرضى بهذا الشى .عدم الذهاب هو رفض من المنبع للفكرة للتغير الفاجر. اما الذهاب فما هو الا منازلة خصم فى ساحة معركة انت تدرك سلفا الشراك والفخاخ التى نصبها لك فى ساحة المعركة ومع ذلك ذهبت لتنازله رغم علمك انه مخادع وشرير ولن تاخذه بك رافة ورحمة رغم انك مجرد من السلاح وجريح وحسن النية وتصعب على الكافر ولكنك بكل بساطة ذهبت للنزال ان تبقى اللجان خاوية على عروشها فى هذا اليوم لهو اشرف للمصريين من الذهاب الذى لن يغير شيئا وكما هو النظام مفضوح خارجيا فالامر لايقل داخليا بل يزيد .تخيلوا بلطجى احضر بضاعة ما واعلن انه سيبيعها كرها لكل الناس وبالامروحدد ساعة ليذهب الناس اليه ليشتروا البضاعة هنا الذهاب فى حد ذاته اعتراف بالبلطجة وشرعنة لها اما عدم الذهاب فهو ابلغ رفض دون ضجيج ودون الدخول فى نزال غير كفء عموما وقفة او بيات ليلة فى ميدان التحرير اقوى واعظم الف مرة من مشاركة فى الاستفتاء المزور سلفا والذى سيشرعن العمل بالتعديلات لفترة الله وحده سبحانه هو الذى يعلمها وكله بارادة الشعب لاحظ ان بالبلد ملايين لايعنيهم هذا الامراساسا والذين سيذهبون لانهم مهمومون بالبلد سيتم تحميل الملايين الذين لايهمهم هذا الامر على ذهابهم بان الشعب صوت بنعم المزورة والذين قالوا لا هنعدلهم الاختيار من لا الى نعم وهنقولهم واحنا بنشد ودنهم احنا غيرنالكم لا الى نعم وهنسامحكم المرة دى لكن ماتعملوهاش تانى

Thu, 2007/03/22 - 14:02 — alaa

الايجابية هي

الايجابية هي أنك تعمل فعل، لو كانت قوى المعارضة اقترحت فعل محدد يمكن تشجيع أعداد كبيرة من الناس عليه كان يبقى ماشي.

لو أصلا اللي بيشاركوا في الاستفتائات بمزاجهم و ضد الحكومة عددهم كبير كان ممكن وقتها يبقى المقاطعة ليها معنى، لكن في وضعنا الحالي لا معنى لها بالمرة.

لو الاستفتاء ده هو آخر فعالية للمعارضة المصرية كان برضه ممكن المقاطعة يبقى لها معنى، لكن دلوقتي المشاركة فرصة للبناء و دي مش آخر معركة و لازم نفكر لقدام (دعوة المراقبة الشعبية في انتخابات الرئاسة اللي فاتت كان ليها دور كبير في دعم الحركة و جماعات المعارضة المختلفة).

ثانيا حد يشرحلي ايه الفرق ما بين الاستفتاء ده و انتخابات اتحاد الطلبة و النقابات العمالية و المحليات و الغرف التجارية، اشمعنى دول المشاركة فيهم حلال؟

يعني ايه تخيل لو محدش راح، ما هو محدش بيروح فعلا ايه الجديد؟ و بعدين هو مثال البلطجي لا معنى ليه لأننا قدام فعل اعتراضي (اللي هو نقول لأ)، محدش بيقول روح وافق.

أرجوك راجع الردود السابقة.

Wed, 2007/03/21 - 21:51 — 3abkarino (not verified)

سلبية لأ.... إيجابية آه

أنا مع علاء جملة وتفصيلا وربنا يستر عليكى يامصر

Wed, 2007/03/21 - 20:49 — 7ntklm (not verified)

مقطعة

مقطعة الاستفتاء المقترب على التعديلات الدستوريا على اقتناع تام .

عندما اشارك واقول لا سيقومو بتزوير ايرادتى بـ انفسهم فيزورون أصواتنا وفى المشاركة هى بمثابة تعزيز لصورة النظام أمام الإعلام الدولى وكاميرات الفضائيات...وبهذا فالمشاركة هى فرصة لتجميل وجه النظام

اكتفى بـ ارضاء نفسى بالمقاطعة بمثابة رفض سلبى للتعديلات الدستورية

Wed, 2007/03/21 - 20:43 — AMS

ولو انى محبط

ولو انى محبط وشايف ان دا مش هيغير حاجه بس كلام علاء منطقى وخصوصا موضوع المراقبه ..... اهو الواحد يحس انه عمل حاجه

Wed, 2007/03/21 - 19:34 — Amr Ezzat (not verified)

عفارم

هو ده الكلام

معارضة بتدعو شعب مدي ضهره للسياسة انه يقاطع الانتخابات و الاستفتاءات ؟ بقي ده كلام له معني أصلا

أضم صوتي لصوت علاء

Wed, 2007/03/21 - 18:23 — spellz (not verified)

aywa

انا كمان مستغربة اصلآ المقاطعة ماتنفعش غير فى بلد ديموقراطى الميزة الوحيدة انها بتورى العالم ان الناس مقاطعة

بس لو كفاية دعت للمقاطعة هيبقى آل يعنى كفاية دعت للمقاطعة قامت الناس كلها ماراحتش مجرد شكليات عشان نحس ان كفاية ليها تأييد رغم ان كدة كدة الناس مقاطعة

ما علينا اصلآ انا مش مولودة فى مصر و آخر مرة روحت انتخب قالولى اسمك مش متسجل فى أى حتة عندنا !!!

و طبعآ انسى حكاية بطاقة انتخابية دى

اوووف !!!

Wed, 2007/03/21 - 17:16 — مصري (not verified)

عيز أسال انا

عيز أسال انا عندي 17 سنه عندي بطاقه شخصيه بس ممكن اروح الستفتاء اارجو الافاده

Wed, 2007/03/21 - 16:29 — ابن ناصر (not verified)

المقاطعه = سلبيه

يزوروا ماشي بس نبقي عملنا اللي علينا مش نعد في البيت احط رجل علي رجل واتفرج علي التلفزيون وأقول انا وطني أنا مقاطع لازم نروح ونقول لأ,,, وأنا مش عارف اتواصل مع بتوع كفايه خالص عان نشوف وجهة نظم اغريبه والسلبيه وقع علي عريضه شعبيه ترفض التعديلات الدستوريه,,, تعالوا وقعوا http://ibnasser.blogspot.com

Wed, 2007/03/21 - 14:47 — BeLiEvEr (not verified)

لأ للمقاطعه!

أنا مع علاء، المقاطعه يعنى سلبيه. و سلبيتنا دى هى اللى مقوياهم علينا. لازم كلنا نروح و نقول لأ.

و لازم كلنا نقوم بدور فى مراقبة الإستفتاء ده، بس لازم يكون فيه تنسيق، يعنى لازم يكون فيه مكان واحد بتتجمع عنده كل الأخبار من كل الدواير.

Wed, 2007/03/21 - 12:44 — a m r (not verified)

أصلا الشعب

أصلا الشعب مقاطع خلقة، فأما نعمل تأصيل للمقاطعة و تعزيز لهذه المقاطعة من قوى المعارضة دة هيغير الموقف و يخلي الصورة في إطار أشيك من كونه مجرد سلبية و يبقى شكله محرج للنظام أمام العالم

أما المشاركة بافتراض أفضل الظروف لو العدد الي شارك ضعف العدد اللي أيد أيمن نور فى الانتخابات مش هيغير في الأمر شئ و لن يقترب من 50% بالإضافة الى ان المعارضة ليس عندها قدرة حشد الحكومة و اجبار الموظفين و العمال على النزول في عربيات الشركات والمصانع و المصالح ليقولوا نعم، كما أن إقناع الناس بالنزول لقول لا أصعب كثيرا و ليس في سهولة اقناعهم للنزول في انتخابات مجلس الشعب فالفائدة و المصلحة غير ملموسة عن قرب بخلاف و صعب أن تقنعه و تفهمه بمصطلحات السياسة مخاطر التغيير او ما معنى الدستور اصلا، فالموضوع مش عاطفي زي بتاع المجلس حيث يرى المواطن نائبه و يعرفه و يرى خدماته و ينتخبه لانه بيحبه مش عشان هو اخوان ولا وفد.. فالموضوع مختلف و النسبة لن تصل للربع كما في المجس و لا حتى العشر كما مع ايمن نور

أما المراقبة و رصد فضائح ما يجري فلا يتطلب المشاركة و يمكن أن تتواجد طوال اليوم في موقع الحدث دون أن تقول لا

فأرى أن الافضل استمرار دعوة المقاطعة لكن دون تنظيم مظاهرة لاعلان ذلك و استغلال وقت المظاهرة فى عمل المراقبة مع منظمات المجتمع المدني و حركة شايفينكم و غيرها

Wed, 2007/03/21 - 18:51 — يساري ديمقراطي (not verified)

نعم للمشاركة و ألف لا للمقاطعة

مع إني مش من هواه التعليق بس أوعدكم إنها هاتكون المرة الأولى و الأخيرة لأهمية الموضوع.

طبعاً أنا متفق مع الأستاذ اللي بيقول الناس مقاطعة أصلاً و دة سبب قوي لأننا ندفعها تشارك علشان المشاركة بالتصويت المرة دي هو اللي هايخلينا شركاء في صنع القرار بعد كدة مش نزودهم إحباط و نقول لهم مافيش فايدة خليكم في بيوتكم

ثانياً:زي ما قال نفس الأستاذ برضه إن الحكومة بتحشد الموظفين و العمال يروحوا يصوتوا و احنا ما نقدرش نعمل نفس الموضوع و دة صحيح و دة سبب تاني يخلينا ندعي الناس اللي بتروح عصب عنها دي تقول لأ بدل ما تقول نعم و بكدة نبقى كسبناهم في نفس المعركة لأن شجاعتهم ممكن تخونهم لو قلت لهم إرفضوا تروحوا و قاطعوا لكنهم هايقدروا يحطوا الستارة و يقولوا لا

ثالثاً: الدعوة للمقاطعة بدون ترتيب قوي لمراقبة شعبية للانتخابات في كل اللجان هايفتح الطريق لأن الحكومة توصل نسبة التصويت للنسبة اللي بتطلع كل مرة و يبقى الموضوع إن نفس الناس اللي بتصوت كل مرة راحت قالت نعم و الباقي ما راحش و ماحدش قال لا و دة يفيد الحكومة أكتر ما يفيد القوى الديمقراطية و التقدمية

Wed, 2007/03/21 - 18:40 — iman (not verified)

لا

انا بتفق مع كلام الاخ عمر........انا اكيد حقول لا بس غيرى كتير حيقول موافق واكتر مش حاسس بأى حاجه من اساسه انا متشأمه جدا

www.amonna.blogspot.com

Thu, 2007/03/22 - 04:34 — Anonymous (not verified)

كفاية ايجابية.

كفاية ايجابية. مش هنقول حاجة :P

Sat, 2007/03/24 - 02:56 — اشرف (not verified)

الشعب المصري

الشعب المصري شعب طيب وغلبان وهيفكر انه لو قاطع الانتخابات هيبقي ده ف صالح البلد

Sun, 2007/03/25 - 07:03 — Masry ebn masry (not verified)

Mouritania

Law lam akon Mouritaneyann lawadadto an akoun mouritaneyann... 7aram ya masr 7arammm.... e7na newsal le keda we mouritania te3mel ente7'abat naziha.... allah ye7'reb beit elswra we 3abdelnasser wel Sadat we Mobarakkkkk.... We gamal mo2adamann.. Ana ba7eb masr we heya nasyany ya 3alam...

Masry ebn masry (Ya3ni ebn 60 Kalb)

Sun, 2007/03/25 - 11:37 — أحمد اللي عايش في الزقازيق (not verified)

بيتهيألي الجيش

بيتهيألي الجيش المصري عملها قبل كده سنة 1952 و الجيش السوداني عملها قبل كده مش فاكر سنة كام بس ده كان أيام الرئيس سوار الذهب اول رئيس عربي سابق الثورة لو مش من الشعب تبقى انقلاب و مش ليها لازمة لأن الشعب مش هايحس انه عمل حاجة و مش حس بالمعاناة و مش تعب في التغيير علشان يحافظ عليه

Sun, 2007/03/25 - 14:11 — m-2007

يا جماعة

هناك مشكلة حقيقية يا جماعة لا رابط حقيقي بين المتعاملين مع المدونة هنا و عندما يتسائل احد عن شىء ما فى موضوع نادرا ما تكون هناك اجابة و على جانب اخر لا احد يستطيع التواصل مع اخرين فى الوقت الذى نحتاج فيه لذلك يعنى مثلا عند التنظيم لمظاهرة سلمية كالخاصة بالليلة لا احد يعرف من له علاقة بماذا و لا من يتبع من و لا هل هناك شروط و لا كيف يعثر على اخرين من المتظاهرين يعنى نحن بصدد تحرك به البعض مترابط و يعرف البعض الاخر و البعض الاخر مثلى يتعامل بلا معرفة و تواصل لسنا خونة او موضع شك لتتخوفوا منا و انما نرغب ببعض المساعدة لتتكامل ادوارنا لأننا لن نتراجع و لا ننوى ذلك و لكن نحتاج لبعض الارشاد و التعاون

Sun, 2007/03/25 - 14:50 — m-2007

اقتراح

اقترح ان نعقد هنا فى المدونة و فى المدونات الاخرى المماثلة و مواقع كفاية و ما شابهها ان نعقد استفتاء عكسى يعنى ان توضع استمارة فى اسرع وقت وتتصدر الصفحة الرئيسية فى كل المدونات و المواقع السالف الاشارة لها و تضم هذه الاستمارة البيانات الشخصية و الافادة الصريحة برفض مالىء الاستمارة للتعديلات غيرالدستورية اياها ثم ننشر نتيجة هذا الاستفتاء على المدونات و المواقع التى ذكرتها سالفا و ايضا نخاطب بها اى نرسلها لموقع و قناة الجزيرة مثلا و برامج الفضائيات الموضوعية لتنشر نتيجة هذا الاستفتاء العكسى و اذا طعن او شكك احد فى عدم مصداقية هذا الاستفتاء فلنواجههم بان فلتفحصوا عينات عشوائية من الاستمارات و بيانات اصحابها لتتأكدوا من صحتها انا جادة و ارجو الا تتجاهلوا هذا المقترح فقد يكون محاولة جيدة و قد تثمر

Mon, 2007/03/26 - 01:56 — mo7amed ra2oof elgyar (not verified)

الدستور

انا شايف ان بابا حسنى وماما سوزان مدلعين الشعب ولازم الشعب يدلع حتلاقوا فين احسن من كده انتو حتنهبوا وبعدين اللى حييجى بعد بابا حسنى حتى لو مش جمال مش حيعرف يعمل حاجه عشان حيقول انا مستلمها خربانه وسيبونى عشرين سنه عشان اظبط نفسى تكون ناس ماتت وناس صحيت وانا من هذا المزنء بقول لا جمال ولا علاء حيمسكوا الحكم بعد بابا حسنى لان......................لا ينكح الابن ما نكح اباه وسلملى عالبتنجان

Random image

tags used in blog posts

User login

Live discussions

Recent comments

Syndicate