Manal and Alaa's bit bucket free speech from the bletches

برنامج drupal اللي بنينا عليه خدمة استضافة المواقع الكصرية مجانا على manalaa.net يعتبر برنامج معقد بالمقارنة بخدمات بسيطة و محدودة زي blogger و يمكن يكون أصعب سنة من wordpress. لكن ده مش معناه أنه صعب بجد بالعكس البرنامج بسيط جدا في الاستخدام، المشكلة أن امكانياته كتير (و أنت أكيد مش محتاجها كلها على الأقل في الأول) و اللي بيحصل أن الواحد بيحاول يخبط في كل حاجة مرة واحدة و يتلخبط.

المقال ده عبارة عن مجموعة نصائح لتعمل ايه بعد ما تستلم صفحتك الجديدة، أنا هبدأ بأني أشرح ازاي تعمل الاعدادات و عمليات النشر الأساسية و هأجل شرح مفاهيم دروبال و مزاياه المتقدمة لمرة تانية.

المقال ده مكتوب لدروبال غير معرب، صاحب الأشجار شغال على التعريب و قرب يخلص، و اللي عايز يستخدم الواجهة العربي من دلوقتي يقولنا أهي فرصة يساعد في اختبار و تقييم التعريب.

navigation menu

القائمة الأساسية هي اللي منها تقدر توصل لكل حتة في دروبال و تتحكم في كل حاجة، في المعتاد هتشوفها على الجنب (يمين أو شمال) بعد الدخول مباشرة، عنوان القائمة بيكون دائما اسم المستخدم

ادارة الموقع بتكون عن طريق القائمة الفرعية administer.

اعدادات الموقع الأساسية

تحت administer->settings

أي حاجة هتفادى ذكرها يبقى مش مفروض تغيرها من غير متكون فاهم بتعمل ايه.

الصفحة دي فيها الاعدادات الأساسية للصفحة و ممكن منها تعدل:

1. Name - اسم الموقع
2. Email Address: بريد لصاحب أو مدير الموقع
3. Slogan - شعار للموقع
4. Mission statement - وصف للهدف بتاع الموقع
5. Footer - تذييل الموقع
6. Anonymous user - اسم أي مستخدم ميهملش login زي guest أو Anonymous Coward أو Shy Person etc.

الأسم و الشعار في الغالب بيبانوا في الترويسة فوق و في شريط النافذة بتاعت المتصفح، الهدف بيبان على الصفحة الرئيسية فقط (لاحظ أن الحاجات دي كلها يمكن تعديلها).

كل اللي فات ده في مجموعة General Settings انزل لتحت لحد ما تشوف مجموعة Date settings و اظبط الساعة حسب المنطقة الزمنية اللي أنت مقيم فيها، السيرفر معمول على توقيت جرينيتش و بيعيد ضبط الساعة كل شوية عن طريق ساعة نووية عالية الدقة.

في الأخر دوس save configuration المفروض دلوقتي التغييرات يكون بان تأثيرها، زور الصفحة الرئيسية عشان تشوف الmission statement

التيمة أو الطراز

تحت administer->themes

دروبال بيجي معاه عدة أشكال/تيمات مختلفة، و ممكن طبعا تعدل فيهم لو عايز.

التيمة اللي هيتعلم عند عمود default قدامها هي اللي هتستخدم، ممكن تفعل أكتر من تيمة و تسمح لكل حد عنده حساب على الموقع أنه يختار اللي تريحه، في الحالة دي حط علامات في عمود enabled على التيمات اللي عاوز تتيحها

أول ما تضغط save configuration هيبان الشكل الجديد.

لاحظ أن كتير من التيمات عامل حساب الشكل اللي هيشوفه القارئ فقط، و ممكن يبان شكل جداول و استمارات الاعدادات سيئ جدا، دايما جرب تفتح الصفحة الرئيسية قبل ما تقرر اذا كانت التيمة عاجباك ولا لأ.

طيب لو عاجباني تيمة من اللي شكلهم وحش في شاشات الاعدادات أعمل ايه؟ ممكن تحل الموضوع بأنك تعمل حساب مستخدم جديد يكون مسئول عن الاعدادات، و الحساب ده يستخدم أي تيمة تانية مفيهاش المشكلة دي.

طبعا موضوع الجداول اللي شكلها وحش ده غالبا دليل على ضعف في التصميم و اهتمام بالشكل على حساب اعتبارات عملية مهمة، و غالبا التيمات دي يتكون مش مريحة لضعاف البصر اللي ممكن يكوني بيستخدموا خدود كبيرة أكتر من المعتاد، يعني من الأخر رغم أن شكلهم شفتشي و حلو مانصحش تستخدموهم.

طيب دي التيمة الأساسية، لو عايز تعدل فيها ممكن تزور administer->theme editor بس لازم تكون بتفهم في CSS و HTML الأول (غالبا مش هتحتاج تعدل غير ملف css واحد).

HTML و CSS مش حاجات صعبة (على الأقل الأساسيات) بس متستعجلش على نفسك، دور على النت و هتلاقي موارد كتير عنهم.

اعدادات الشكل العام

administer->themes -> configure

صفحة اختيار التيمة administer->themes قدام كل تيمة هتلاقي رابط configure و ده منه هتوصل لصفحة تتحكم فيها في الشكل العام للموقع.

أول حاجة اللوجو بتاع الموقع، اعمل upload لأي صورة و هتبان في الترويسة على طول.

toggle display دي بتتحكم بيها في ايه العناصر اللي هتبان على كل صفحة في الموقع و دي بتشمل اسم الصفحة و الشعار و الهدف و كمان فيها

1. Primary links - مجموعة روابط غالبا جزء من الترويسة
2. secondary links - مجموعة اضافية من الروابط
3. User pictures in posts - كل مستخدم له صورة (افاتار) مرتبط بيه، لو عاوز الصورة تبان مع كل مقال بدل من مجرد اسم الكاتب
4. User pictures in comments - اظهر صورة المستخدم في التعليقات

و في الأخر هتلاقي الحتة اللي ممكن فيها تضيف روابط للprimary and secondary links

قوائم و روابط

تحت administer->menus

في الغالب الواحد بيعوز يعمل قوائم بروابط خارجية و داخلية على هوامش الصفحة (اسمها sidebars في دروبال)، في شاشة administer->menus هتلاقي القائمة الرئيسية تحت اسم navigation و على manalaa.net مجهزينلكم قائمة اسمها links.

تقدر تعمل قائمة جديدة بالضغط على add menu و ده في الروابط اللي على شكل لسان (tab) فوق.

أما لو عاوز تضيف رابط لقائمة لازم تدوس على add menu item.

title

ده نص الرابط

path

ده عنوان الرابط، لو عنوان داخلي اكتب الجزء اللي بعد عنوان الصفحة لو خارجي لازم تكتب عنوان كامل

parent item

كل رابط له أم، و ده اللي بيحدد هيبان فين، لو الأم اسم قائمة يبقى هيبان فيها لو الأم رابط يبقى هيبان كرابط فرعي للأم

weight

ده بيبان كتير في دروبال لما تعوز تحدد ترتيب مجموعة عناصر في لستة، العنصر اللي وزنه أخف هيطفوا لفوق و يكون ترتيبه الأول، غير كده الترتيب بيكون ابجدي

خد بالك لو عملت قائمة جديدة مش هتبان على الهوامش مباشرة، الحاجات اللي على الهوامش اسمها blocks و البلوكات بنتحكم فيهم من صفحة administer->blocks و كل قائمة ليها بلوك

المحتوي

تحت create content->story

لحد كده كلام جميل ظبطنا الموقع و جهزناه بس المهم الكلام اللي هنكتبه صح؟

المسألة بسيطة جدا و الفورم مفهوم عنوان و جسم المقال، جرب كده تكتب أي حاجة من غير تنسيق و انشر هتلاقيها طلعت على الصفحة الرئيسية.

طيب لو عاوز تنسق؟ قدامك أربع اختيارات

1. اكتب html مباشرة لو بتعرف html، و في الحالة دي الأفضل أنك في فورم create content -> story في الحتة بتاعت input formats و اختار pure HTML أو FULL HTML
2. اكتب بطريقة الويكي، و ده اختياري المفضل و مش هتاخد دقائق عشان تتعلمها، و على فكرة ممكن تخلط HTML مع الويكي.
3. استخدم محرر wysiwyg داخل موقعك، و ده اختيار في رأيي سيئ جدا لو مصر عليه لازم تفعل وحدة htmlarea من شاشة ''administer->modules'
4. باستخدام برنامج خارجي (blogging client)، أنا معنديش خبرة بدول بس ممكن تستخدمهم في دروبال بعد متشغل وحدة blogapi من administer->modules

أظن كده غطينا الأساسيات، تحت أمركم في أي أسئلة، و اللي نفسه يعرف أكتر يقرأ drupal handbooks