Home › رسائل من سجناء الحرية › علي الفيل

غرست بكل المقاييس

Thu, 2006/05/18 - 18:46 — Manal

غرست بكل المقاييس

مبروك عليك يا سي الوريث

غرزت وفين بس الفتيس

ماهى تكيه .. وخدتها

شروة .. مقاولة

وبكره راح تبقى الرئيس

على جثتي .. وإبقى قابلني

حدش يصدق .. إن إبليس اللعين

ف الجنه .. راح يبقى عريس

أو إن عاشق للوطن

ممكن ف يوم

يبقى خسيس

دا بعيد على شنبك

لو إنك أجرُدي

مخصي وتيس

وإن كنت قادر

باللي محمي خلفهم

دلوقتي

راح تقدر تهيص

وإن بسلامتك .. وبعصابتك

وبكامل كلاب المعتقل

الشعب يوم .. راح يستغيث

يبقى إنته غلطان

يا ابن ماما

يا اللي جاي ليلة خميس

غلطة

على إيدين .. دايه عامشة

وبنت كلب

يا ريتها سابت حضرتك

ميت فطيس

لكن قدر .. إنك تعيش

لجلن متفرسنا

وسبحان الذي .. خلقك نفيس

بارد .. كلح

والدم ف عروقك زفر

وبدون كرامه .. لو بصيص

لكن أحب أعرفك

إن البهية .. مش تكيه

لحضرتك

وإن كان أبوك

حاكمنا .. بالجيش والبوليس

ها البت .. إسمع كلمتين

وافهم بقى

ياتسيبها .. وتعيشلك

يومين

يا تموت تعيس.

11/5/2006 (سجن تحقيق طره - غرفه ١ - عنبر ٧ - سجناء الحرية)

‹ إلى سجين الحرية د / أيمن نورupوالله زنزانه عجب ›