Manal and Alaa's bit bucket free speech from the bletches

Description:

قررت النيابة احتجاز كل اللي اعتقلوا في اعتصام التضامن مع القضاة 15 يوم على ذمة التحقيق، احتمال يطلق سراحهم بدري و احتمال برضه يتجدد لهم الحبس.

الأصدقاء مالك و بهاء و شرقاوي و دروبي و وائل خليل من ضمن المحتجزين، منيش قلقان عليهم سمعنا أنهم كويسين و محتجزين مع بعض و الحبس ضريبة بيدفعها عشرات الألاف في بلدنا لكن واحشني و أنا طبعا عاجز عن أني أعملهم أي حاجة مفيدة

مالك قبل ما يتقبض عليه كتب تدوينة جميلة ذكر فيها أمي و فيها صور لأختي اللي أول مرة تشارك في اعتصام بعد ما سمعت عن اللي جرى في أول هجمة، اللي يقرأ تدوينات مالك و يشوف الصور يحس بجو هدوء و تواصل و متعة و لا كأن فيه حاجة حصلت و لا كأن فيه حاجة هتحصل، يا ترى يا مالك نقلت الجو ده للسجن؟