Manal and Alaa's bit bucket free speech from the bletches

على فكرة اختلاف وجهات النظر ممكن جدا يفسد للود قضية، يعني لو سيادتك مثلا بتسمع هاني شاكر أو مقتنع أن جارتكم راكبها عفريت و بتكلم الجان ده غالبا هيفسد أي قضية للود ما بينا.

منير و سعاد ماسي و تامر حسني فنانين لأن عملهم الفن، النجار التعبان نجار برضه، مبننفيش عنه صفه النجار لمجرد أن شغله مش عاجبنا (خصوصا لو كان شغله عاجب آخرين).

سعاد ماسي و تامر حسني فنانين تعبانين (بنفس الدرجة في رأيي) و منير فنان كويس.

يا سيدي أنا نزلت كل أغاني نيزك الشرق سعاد ماسي و قعدت ثلاث أيام مشغلهم طول الوقت في محاولة لفهم البني أدمين اللي توسمت فيهم العقل و الذوق الجيد عاجبهم فيها ايه و مفهمتش خالص خصوصا أن كل أغانيها شبه بعضها، مش ممكن بعد ده كله يكون ناقصني أحضرلها حفلة.

و لا دي كده عاملة زي أم كلثوم اللي أنا المفروض هحبها لما أكبر؟