Manal and Alaa's bit bucket free speech from the bletches

في الحلقة السابقة

في شهر أكتوبر اللي فات بدأت مناقشة عن مستقبل مجمع المدونات المصرية اللي حاليا جزء من موقع manalaa.net، طرحت وقتها مشكلتين بتواجه المجمع، مشكلة مادية و تقنية في تحمل العدد المتزايد للمدونات و الزوار و مشكلة تقنية و تنظيمية في نعرض التدوينات ازاي مع تزايد عددهم بالشكل السريع ده.

من المناقشة كان واضح أن فيه اهتمام باستمرار مجمع المدونات المصرية على صيغة مفتوحة للجميع و مفيهاش اختيار مدونات، و في التعليقات ظهرت اقتراحات عديدة لمشكلة حجم المحتوى أغلبها تنفيذه محتاج مجهود كبير و برمجة كثيرة.

و بعدها انقطع النقاش بسبب المواضيع السخنة اللي بترف على المدونات و بسبب سفري مدد طويلة.

رغم أني مكملتش المناقشة على المدونة لكن كملت مع أصدقاء كثر و خدت مجموعة قرارات، مرتبطة أساسا بالوضع المادي و تمويل المجمع، قبل ما أشرح القرارات دي خليني ألخص الفترة اللي فاتت.

من أين لنا هذا

المجمع بدأ في يناير 2005 كان عدد المدونين صغير جدا و عدد الزوار صغير جدا جدا، تكلفة الاستضافة كانت لا تذكر وقتها و كنا بندفعها أنا و منال من جيبنا، مع الزمن زاد عدد المدونين و عدد الزوار و اتنقلنا من shared hosting لvirtual servers و بعدين لdedicated server و قعدنا نرقي السيرفر كل شوية لحد ما وصلت التكلفة 60$ شهريا (كان وقتها عدد المدونين بالمئات و عدد الزوار الدائمين ميعديش 10000).

طول الفترة دي كان السيرفر شايل في نفس الوقت مجموعة من المواقع و المدونات اللي أحنا مستضيفنها او بانينها كعمل تطوعي، مسألة الاستضافة دي كانت هي الهدف الأساسي من شراء نطاق manalaa.net و تأجير سيرفرات و كانت الأولوية بالنسبة لينا، لكن مع الزمن بقى المجمع أهميته أعلى و بسبب قلة امكانيات السيرفر بالنسبة للضغط عليه كان بياخد مننا مجهود و وقت أكثر.

وقتها كان كل شوية كل المواقع اللي على السيرفر تنهار بسبب المجمع، فقررنا أن ضروري يتفصل مدونة منال و علاء و المجمع عن باقي المواقع، لكن امكانياتنا مكانتش تسمح بدفع أكثر من 60$ شهريا فقررنا طلب المساعدة من الأصدقاء.

أول اقتراح جالنا كان جمع تبرعات، المشكلة كانت أن أغلب المتبرعين عايزين يدفعوا مبالغ صغيرة و ده معناه أن أنا أو منال نقضي وقت و مجهود كبير في جمع الفلوس و ده طبيعي هياكل من الوقت المخصص للعمل على السيرفر و المواقع و تدريب محرري المواقع، فقررنا أننا هنلم فلوس سنة كاملة (و قدرناها وقتها أنها هتكون 5000 جنية مصري) و مش هنقبل تبرعات صغيرة. قمت كتبت جواب صغير بيشرح أحنا بنحاول نعمل ايه في manalaa.net و محتاجين كام و ليه و مررنا على معارفنا اللي قادرين على دفع مبالغ كبيرة نسبيا، و اتلمت الفلوس فعلا (دفع أغلبها الأستاذ هاني عنان).

الكلام ده كان في مارس 2006 لو ذاكرتي صحيحة، بعدها طبعا بدأت الاعتقالات و شعبية المدونات قفزت جامد جدا، أول ما طلعت من السجن لقيت أني محتاج أرقي سيرفر المجمع ترقية كبيرة و أرقي سيرفر الاستضافة، جمعت تبرعات ثاني رغم مرور أقل من نصف سنة على جمعي لما تصورت أنه هيغطي سنة كاملة (اللي دفعوا المرة دي كانوا مجموعة أكبر أحب أشكر منهم وائل خليل و حسام الحملاوي و عمرو غربية).

و بس من أول يوليو 2006 و تكلفتنا 100$ لسيرفر الاستضافة و 140$ لسيرفر المجمع شهريا.

طبعا مبلغ خرافي و مع ذلك مش مقضي، يعني ضروري نغير الموضوع تغيير جذري. (اكتشفنا وجود ألاف المدونات اللي مش مضافة للمجمع و في نفس الوقت شعبية التعذيب في مصر و جار القمر و فرقة رسالة زادوا فجأة ده غير النجاح الباهر للمدونات بعد موضوع التحرش الجنسي، مصيبة يعني).

ما العمل

فيه ثلاث موارد أحنا بنستهلكها، وقت التقنيين (اللي هما حاليا أنا و منال و أحيانا محمد سمير) و فلوس و موارد السيرفرات.

لازم يا أما نزود الموارد دي يا أما نقلل استهلاكها، يعني مطلوب تحسين أداء المجمع بحيث ما يستهلكش موارد كثير (بس ده محتاج وقت برمجة و صيانة أكبر) أو نزود امكانيات السيرفر (و وقتها المفروض أني ألاقي وقت أكثر للبرمجة بما أن الصيانة هتاخد وقت أقل). و ممكن طبعا نزود عدد المتطوعين بوقتهم بدل ما نزود الفلوس.

حد فاهم حاجة؟

قرار ثوري رقم ...

بعد تفكير طويل في الموضوع ده وصلنا للقرارات دي

تمويل المجمع هيكون عن طريق اعلانات

بدل من جمع التبرعات هنحاول نمول المجمع عن طريق الاعلانات، بما أن نظريا الاعلانات هتدفع أكثر لما يزيد عدد الزيارات. المشكلة أن نظام اعلانات جووجل مرتبط أساسا بأن الناس تدوس على الاعلانات (و أنا بصراحة مش شايف ليه في بني أدم عاقل هيدوس على اعلان) و بالتالي مقدرش أخمن خالص هل موضوع الاعلانات ده هينفع ولا لأ، الأكيد أن التبرعات مش هتنفع لو التكلفة استمرت في الزيادة بالشكل ده.

المجمع هينفصل عن المدونة

فصل المجمع عن المدونة كان دائما في الخطة و أظن سنتين وقت كافي عشان نفطم المجمع، السبب الرئيسي للفصل دلوقتي هو موضوع الاعلانات، أنا مش عاجباني فكرة اعلانات على مدونة دي خاصة لكن المجمع خدمة و خدمة مكلفة فبالتالي معنديش مشكلة أحط عليه اعلانات.

سيرفر جديد للمجمع

حاليا المجمع واقع نصف الوقت، لو ناوي أحط اعلانات و أستنى منها أنها تغطي التكلفة لازم نحاول أن المجمع ميقعش خالص، يعني لازم نستثمر في سيرفر أفضل لحد ما يبدتي عائد الاعلانات يبان.

حسبناها كده و قررت أن 3 شهور مدة كويسة، شهر على ما أظبط أموري و شهر على ما يجي عائد و شهر كمان على ما نشوف هوصلولنا الفلوس ازاي.

لقيت سيرفر كويس و ابن حلال بتكلفة 150$ في الشهر من netsonic.com و قررنا جمع التبرعات مرة كمان لتغطية ال3 شهور دول، قام بيسو مشكورا بدور جابي ضرائب العمرانية و جمع تبرعات توازي 400$ من مدونين و قرائهم و على أساسه حجزت فعلا السيرفر و بدأت في تجهيز http://www.omraneya.net.

ضم مدونة منال و علاء على باقي مدونات و مواقع الشبكة

بعد فصل المجمع هنقل كل المدونات و المواقع الي مستضافة على manalaa.net على السيرفر أبو 100$ الي السيرفر أبو 140$ اللي عليه مدونة منال و علاء (بما أنه هيفضى و يخف خالص بعد اختفاء المجمع)، تكلفة السيرفر ده هتتدفع من جيبنا بمعدل 60$ في الشهر و من باقي التبرعات القديمة لحد ما يبان نتيجة موضوع الاعلانات ايه.

المرة دي هتكون آخر مرة أجمع فيها تبرعات للمجمع

ده معناه أن لو الاعلانات مجابتش 150$ شهريا على الأقل ممكن أقفل المجمع خالص، أنا متمسك بموضوع الاستضافة لكن المجمع تكلفته بقيت عبثية.

طبعا ممكن قبل ما تكون الاعلانات أثبتت فشلها يظهر حد يساعدنا و نغير البنية بتاعت المجمع و تقل التكلفة خالص، أو مين عارف يمكن البريمو يضرب و الاعلانات تعمل دخل جامد و نتنغنغ.

أمرنا هيكون شورى بيننا

في رأيي نجاح مجتمع التدوين المصري معتمد بشكل كبير على أن حلقة المدونات المصرية و المجمع تم ادارتهم بشكل ديكتاتوري محدش له رأي فيه لكن بشكل فعال و مفتوح للجميع و مشجع على التشبيك، لو كنا حولنا الادارة للجنة أو لشكل أكثر ديمقراطية كانت خربت في أول مناقشة عن البذائات.

لكن في نفس الوقت منقدرش ننكر أن فيه ناس كثير بدأت تشوف المجمع كأرضية مملوكة للجميع (مثلا تخطيط حملة كلنا ليلى اللي اعتمد على المجمع في الأول و اللي تسبب في خناقة بيني و بينهم)، ده غير التذمر المتزايد من تفاصيل عديدة في المجمع و تأخري عن اضافة المدونات و عن تطويره و تأخرمنال عن تغيير تصميمه.

بما أن المجمع هينفصل و بما أن تكلفته شارك فيها ناس كثير و بما أن المشاكل التقنية اللي بتواجهنا بقيت أكبر من أننا نحلها لوحدنا أظن جاء الوقت اللي نبتدي فيه نوسع قاعدة اتخاذ القرار بتاعت المجمع.

ده مش معناه نهاية عهد الديكتاتورية لسه، لكن معناه أننا هنبدأ نستشير مجموعة واسعة من الناس و هنحاول نخلي عملية الاستشارة دي علنية، يعني على رأي حكومتنا هنوسع هامش الديمقراطية. و استعدادا لأزهى عصور الديمقراطية اللي هيجي قريب ما تقلقوش هنبدأ في تكويد قواعد المجمع بشكل واضح.

التجنيد و توسيع القاعدة الجماهيرية

عشان ننفز كل الأحلام دي محتاجين نوسع قاعدة الناس اللي شغالة معانا، تم بالفعل تجنيد محمد سمير و بودي و الأخوان غربية و بنت مصرية في الجناح التقني لجماعة 30 فبراير و جاري البحث عن مرشحين جدد، و مع وجود ابليس شخصيا و الشهيد مالك مصطفى بروحه في صفنا لا يسعنا الا النجاح.