Manal and Alaa's bit bucket free speech from the bletches

زي ما أنتوا عارفين الموقع ده مش بس مدونة كمان عليه مجمع المدونات المصرية المجمع عبارة عن برنامج بيزور كل المدونات المصرية المعروفة كل كام ساعة بحثا عن تدوينات جديدة، لما بيلاقي تدوينات جديدة بيعيد نشرها في مكان مركزي.

المجمع

بالاضافة للمدونات بنجمع كام موقع اخباري كمان. المجمع متقسم باللغة أساسا لكن كمان بيسحب التصنيفات من المدونات و الناس تقدر تتصفحه بالتصنيف (و ان كان أغلب المدونات المصرية مبتستخدمش نظام تصنيف).

المجمع مكانش أول جهد لتجميع المدونات المصرية، البداية كانت مع حلقة المدونات المصرية اللي علمها حلمي و لحد النهاردة الحلقة هي المصدر الأساسي اللي بنكتشف عن طريقه مدونات مصرية جديدة (لكن كمان الناس بتقدر تضيف مدونتها للمجمع مباشرة).

الزوار

أقدر أجزم أن المجمع كان ليه دور أساسي في نمو التدوين المصري و في ظهور المدونين اعلاميا و في اتساع دور المدونين سياسيا خصوصا اللي بيمارسوا الصحافة الشعبية، المجمع بيزوره من 2000 الي 3000 زائر يوميا أغلبهم بيزوره ثلاث مرات في اليوم على الأقل، في تقديري الغير علمي بالمرة فيه حوالي 30000 شخص بيتعامل مع المجمع على أنه وسيلته الرئيسية ان لم تكن الوحيدة في تصفح المدونات المصرية. و وفقا لتقديري الغير علمي برضه المجمع هو المصدر الأساسي للزوار (referrer) بالنسبة لثلث المدونات المسجلة عليه على الأقل. في الأوقات اللي بيحصل فيها أحداث كبيرة (عنف يوم الاستفتاء، الانتخابات، مجزرة اللاجئين السودانيين، غرق العبارة، اعتقالات المتضامنين مع القضاة) عدد الزوار بيزيد بشكل سريع جدا.

المدونات

المجمع مسجل بيه 1377 مدونة و أرشيفه فيه 63886 ألف تدوينة، معدل نموه سريع جدا، قمثلا في أول نوفمبر 2005 كان مسجل بالمجمع 372 مدونة فقط يعني بنتضاعف بمعدل مرة كل نصف سنة (مشابه لمعدل نمو المدونات العالمي).

مجمعنا و الحلقة يعتبروا حالة شاذة في وسط فضاء التدوين العربي، كل المجمعات العربية الأخرى بلا استثناء عندها معايير ما غير المعيار الجغرافي للمدونات اللي بتربط ليها، لدرجة أن المدونة التونسية الأشهر فكرة لجأت سياسيا الي مجمع المدونات المصرية بسبب رفض كل حلقات التدوين التونسية الربط لها.

يعني أهم هدف عندنا هو أننا نكون شاملين لكل المدونات المصرية (تحت تعريف فضفاض جدا للمصرية). و أنا كنت داير فعلا أدعي أن المجمع و الحلقة بيعبروا عن كل فضاء التدوين المصري.

مكتوب

لحد كده و جميل المصيبة بقى أن طلع المجمع مش بدرجة الأهمية اللي أنا متصورها خالص، أكتشفت مؤخرا أن خدمة مدونات مكتوب بها 1546 مدونة مصرية مش مسجلة على المجمع ولا على حلقة المدونات المصرية و ولا عمرنا سمعنا عنها، ده معناه مئات من المدونات اللي مفيش ولا مدون من اللي نعرفهم بيربط ليهم و غالبا معناه فئة من القراء مفيش تقاطع كبير بينها و بين قراء المجمع.

المادة المظلمة

مش بس كده خدمة جيران عندها 27000 مدونة (و ان كان أغلبهم غير ناشط بما أن متوسط عدد التدوينات في المدونة 3) و قد ايه منهم مدونات مصرية دي حاجة في علم الغيب لأن جيران دي خدمة بايظة و مش عارف أعمل فيها بحث بالبلد.

و عندك كمان خدمات زي livejournal و xanga و myspace اللي أكيد عليها مصريين بالهبل و أكيد نسبة منهم عندها مدونات على المواقع دي و عمرهم ما اتصلوا بالمجمع ولا بالحلقة و و صعب جدا التوصل ليهم لأن تصميم البتوع دول ضايع (في علاقة طردية ما بين مدى شعبية التكنولوجيا و سوء تصميمها كما أثبتت مايكروسوفت).

و ده يخلينا نسأل هو ايه تعريف المدونة و هل الهدف بتاع المجمع ده هدف له معنى و يمكن تحقيقه؟ و هل يا ترى ده هدف يهم زوار المجمع؟

الفضاء

أقدر أتجاهل جيران و livejournal و xanga و myspace على أساس أن اللي مستحيل على الوصول اليه غالبا ملوش أي جمهور غير أصدقاء المدون و بالتالي نقدر نقول عليه مش جزء من فضاء التدوين المصري، لكن من الواضح تماما أن كل ادعائاتي عن تمثيل كل التدوين المصري خاطئة و هتفضل خاطئة لحد ما أضيف مدونات مكتوب على الأقل. و من الواضح برضه أن حجم التدوين المصري أكبر بكتير من تخيلنا.

و مش بس كده قبل كده كنت متصور أن الفضاء المصري هو أكبر فضاء تدوين عربي و أن الفرق في الحجم شاسع، لكن مكتوب عليها فوق ال9000 مدونة من دول عربية أخرى (و برضه أغلبهم خارج نطاق التشبيكات و التربيطات بين المدونات العربية).

المستقبل

طيب أنا مش بحكي الكلام ده كله كدرس في التواضع المسألة أنه غالبا الجهاز اللي شغال عليه manalaa.net (اللي هو السيرفر يعني) ميستحملش اضافة الكم ده من المدونات و ده معناه صرف فلوس أكثر (و أحنا أصلا مش قادرين على الوضع الحالي و بقالنا سنة معتمدين على تبرعات و العملية هتقلب شحاتة). أنا كاتب ده كله عشان أسمع أراء في نتصرف ازاي.

يا ترى فيه اهتمام فعلي بمجمع يجمع كل المدونات المصرية ولا الناس عايزة حاجة مختلفة؟ و نعرف كلمة المدونات المصرية دي بأوسع تعريف ممكن ولا لأ؟

خدوا بالكم أني تفاديت تماما الكلام عن جودة المحتوى، فيه ناس بتشتكي أن المجمع دلوقتي بقى أغلبه حاجات متستاهلش تتقري و كلام من ده، انحيازي العنصري ضد التكنولوجيا السيئة بيخليني مقتنع أن ال1546 مدونة على مكتوب أغلبهم زبالة لكن أنا مقتنع أن الزبالة جزء لا يتجزأ من التدوين و أن أحنا ظالمين الزبالة قوي و بعدين زبالة قوم عند قوم درر.

كمان يومين هكتب عن الصعوبات التقنية و المادية اللي بتواجه المجمع و نديها شحاتة ولا نشوف هنعمل ايه في المستقبل.