هو مش المعتقل الوحيد اللي حطينا صورته و لا هيكون الأخير، دور في الموقع و شوف أعلنا و كتبنا و تضامنا مع مين ثاني.

أنا اخترت موضع حرية التعبير على الأنترنت كأولوية بالنسبة لي، و مجتمع التدوين المصري بالذات كأولوية برضه، بالتالي هتلاقي هنا بيتكتب بشكل عشوائي عن قضايا أخرى و معتقلين آخرين لكن هتلاقيني مهتم بالذات بقضايا حرية الرأي على الانترنت

عبد الكريم أول مدون مصري يحاكم على رأيه و بما أني مهتم بالتدوين فطبيعي أني أهتم بقضيته اهتمام زيادة، لو سيادتك تعرف عن مدون ثاني معتقل قوللي عشان أشوف اذا كان فيه أي حاجة (متواضعة طبعا) أقدر أعملها و اذا كان فيه حد معتقل بسبب ما نشره من رأي على الانترنت قوللي برضه.

و يا كابتن اللي يسب الدين مش لازم يتعاقب

لكن أنت مرديتش على سؤالي، اللي يسب أي دين لازم يتعاقب؟ اللي يسب أي ملايين لازم يتعاقب؟ ولا اللي سيب الاسلام و المسلمين بس اللي لازم يتعاقب؟ ممكن ترد على سؤالي؟

أنت متقبلش الاهانة و بعدين؟ هل بعد عقابه توقفت اهانة دينك؟ دور شوية كده على النت (و مش هكلمك عن اللي مش بالعربي يا سيدي)، يعني أنت مستني العقاب ده يحقق ايه؟ خد بالك أن المفروض العقاب لحل مشكلة مش اشفاء لغليل المتضرر و السلام.

السب و القذف جريمة مختلفة عن ازدراء الأديان، السب و القذف المقصود يه سب و قذف مباشر لشخص بعينه، و حتى دي أنا ضد عقوبة الحبس فيها لأنه ببساطة بتستخدم لحبس صحافيين لما يتهموا ناس بالفساد.

يا ريت تحاول تفهم وجهة النظر دي، حبس الناس بسبب تعبيرها عن رأيها دائما ما يستغل لحبس ناس غير اللي في بالك، السب و القذف السبب الرئيسي في حبس الصحافيين في مصر، محاربة الخطاب العنصري السبب الرئيسي في قمع الأصوات المعادية للصهيونية و اسرائيل في أوروبا الغربية و هكذا.

عشان كده بسألك عن جدوى العقاب، لما يبقى عندنا تهمة عقوبتها الحبس ممكن جدا (و بيحصل باستمرار) استخدامها لقمع ناس غير اللي أنت شايفهم يستاهلوا و لما يبقى العقوبة دي لا جدوى لها غير الانتقام يبقى الأحسن في رأيي نلغي عقوبة الحبس في التهمة دي خالص.

التهم اللي وجهتها اليه النيابة من أول يوم تحقيق هي

• إذاعة بيانات وإشاعات مغرضة من شانها تكدير الأمن العام.
• إهانة رئيس الجمهورية.
• التحريض على قلب نظام الحكم وكراهيته والازدراء به.
• التحريض على بغض طائفة " الإسلام " وتكدير السلم العام.
• إبراز مظاهر غير لائقة بسمعة البلد والإذاعة عنها للجمهور .

معرفش دي نفس التهم اللي اتقدمت بيها النيابة للمحكمة ولا لأ، هشوف ملف القضية قريبا.

اتقبض عليه ليه ده سؤال كل حد هيبقى عنده اجابة مختلفة عليه، مثلا جزء من الكتابات اللي هو متهم بسببها مكتوبة من السنة اللي فاتت و أمن الدولة قبضت عليه كام يوم و سابته، اشمعنى يعني دلوقتي.

اجابتي هي اتقبض عليه عشان جامعته بلغت فيه و عشان وكيل النيابة اللي حقق معاه قرر يدخل الجنة على حسه و يتجاهل القانون تماما.

موضوع هاري الاسلام شتيمة و بهدلة ده تقييم مبالغ فيه جدا، فيه مواقع و مدونات فيها أكثر من كده بكثير، لكن يا ريت تكتب هنا الفقرات اللي أنت شايف أنها هارية الاسلام و تسيب روابط كمان (تصدق الاسلام صعب علي؟ مع أنه دين بيدين بيه فوق البليون بني أدم و عمره فوق الخمستاشر قرن لكن يا عيني فيه مدون هاريه).